حکومت نے سٹامپ پیپرز کی فیسوں میں بے پناہ اضافہ کر دیا ہے جس سے سائلین کی چیخیں نکلنے لگی ہیں۔
ذرائع کے مطابق کم سے کم ای سٹامپ پیپر کی مالیت 100روپے سے بڑھا کر 300روپے، طلاق سٹامپ پیپر کی قیمت 100 سے بڑھا کر 1000روپے جبکہ بچوں کے نئے سکولز میں داخلوں اور ملازمت کیلئے ڈومیسائل سٹامپ پیپر فیس بھی 100 روپے سے بڑھا کر 500 روپے کر دی گئی ہے۔
بجلی، سوئی گیس اور پانی کے نئے کنکشن کے سٹامپ پیپر فیس بھی 100روپے کی بجائے اب 1000روپے ہوگی، پراپرٹی سیلز ایگریمنٹ ای سٹامپ پیپر کی فیس 1200روپے سے بڑھا کر 3ہزار روپے کردی گئی ہے، پراپرٹی کے علاوہ کسی بھی معاہدے کیلئے استعمال ہونیوالے ای سٹامپ پیپر کی فیس 100روپے سے بڑھا کر 500روپے، 5 لاکھ روپے تک معاہدے کیلئے ای سٹامپ پیپر کی فیس 1200سے بڑھا کر 3ہزار جبکہ 5لاکھ روپے سے 10لاکھ روپے تک معاہدے کی فیس میں 6ہزار کردیا گیا ہے۔
ڈیڑھ کروڑ روپے سے زائد مالیت کیلئے استعمال ہونیوالے سٹامپ پیپر کی فیس میں 20ہزار روپے اضافہ کیا گیا ہے جبکہ پاور آف اٹارنی کے ای سٹامپ پیپر فیس 1500 سے 1800 روپے کردی گئی ہے، سٹامپ پیپر کیلئے سائل کے نام پر موبائل فون کی سم بھی لازمی قرار دی گئی ہے۔
