اٹک: گورنر پنجاب سردار سلیم حیدر خان نے کہا ہے کہ پیپلزپارٹی عہدوں سے نہیں بلکہ پاکستان سے پاکستانی عوام سے پیار کرتی ہے، لوگوں سے ملنا ان کے مسائل سننا اور عوام میں رہنا صرف پیپلزپارٹی کا شیوا ہیں۔
اٹک کے علاقے فتح جنگ میں کھلی کچہری میں گفتگو کرتے ہوئے انہوں نے کہا کھلی کچہری میں آئے غریب لوگ بھی پاک فوج کے سربراہ کے معترف ہیں،جب تک اس عہدے پر فائز ہوں، غریب آدمی کے ساتھ زیادتی نہیں ہونے دوں گا، اگر گورنر ہاوس میں موجود ہوں اور کوئی گیٹ پر آجائے تو یہ ممکن نہیں کہ مجھے ملے بغیر چلا جائے۔
انہوں نے کہا کہ فیلڈ مارشل عاصم منیر نے بھارت کو شکست دے کر قوم میں پاکستان سے محبت کا نیا جذبہ پیدا کر دیا ہے، ہمارے سپہ سالار فیلڈ مارشل عاصم منیر کا نام پاکستان کی تاریخ میں سنہری حروف میں لکھا جا رہا ہے اور ہمیشہ لکھا جائے گا۔
گورنر پنجاب نے مزید کہا کہ پیپلزپارٹی واحد جماعت ہے جو اقتدار میں ہو یا نہ ہو عوام میں موجود رہتی ہے، میرے کارکن میرے جیالے میرا اثاثہ ہیں، انشااللہ اگلی حکومت عوامی مینڈیٹ سے پیپلزپارٹی کی ہو گی، میں گورنر بعد ہوں اور پیپلزپارٹی کا جیالا پہلے ہوں۔
