اسلام آباد : چیئرمین پی ٹی آئی بیرسٹر گوہر علی نے کہا ہے کہ مخصوص نشستیں ہمارا حق، امید ہے ہمیں 77 سیٹیں ملیں گی،آپریشن بارے پارٹی میں کسی کا موقف مختلف نہیں، چاہتے ہیں معاملہ پارلیمنٹ میں لایا جائے ،بتایا جائے تھریٹ کیا ہے؟۔تفصیلات کے مطابق سپریم کورٹ کے باہر گفتگو کرتے ہوئے چیئرمین پی ٹی آئی بیرسٹر گوہر نے کہا کہ پی ٹی آئی نے اپنے امیدواروں کی لسٹیں الیکشن کمیشن کو دی تھیں، 13جنوری کو سپریم کورٹ نے ہم سے نشان لے لیا تھا، سپریم کورٹ کے فیصلے کے بعد وہ معاملہ آگے نہیں بڑھا۔انہوں نے کہا کہ آرٹیکل 51کے مطابق کسی پارٹی کو جیتی سیٹوں سے زائد سیٹیں نہیں مل سکتیں، سیٹیں اس جماعت کو ملنی ہیں جن کا ووٹ ہو گا۔
انہوں نے کہا کہ یہ مخصوص نشستیں ہماری پارٹی کا حق ہے، امید ہے ہمارے حق میں فیصلہ ہوگا اور ہمیں ہماری 77 سیٹیں ملیں گی۔ایک سوال پر انہوں نے کہا کہ اعلامیہ اس لئے جاری نہیں ہوا کہ اسمبلی کارروائی کے باعث کور کمیٹی میٹنگ مکمل نہ ہو سکی، آپریشن سے متعلق پارٹی میں کسی کا موقف مختلف نہیں ہے،ہمارا موقف صرف اتنا ہے کہ پہلے معاملہ پارلیمنٹ میں لایا جائے، ہمیں بتایا جائے سیکیورٹی صورتِ حال کیا ہے کیا تھریٹ ہے۔
ایک سوال کہ علی امین کہتے ہیں کہ آپریشن کا فیصلہ ہو چکا پر بیرسٹر گوہر نے کہا کہ میری علی امین سے کوئی بات نہیں ہوئی۔
