اسلام آباد: سپریم کورٹ نے این اے 97 فیصل آباد میں دوبارہ گنتی کی لیگی امیدوار علی گوہر بلوچ کی اپیل خارج کر تے ہوئے ریمارکس دیئے ہیں کہ ریکارڈ سے کہیں ثابت نہیں ہو رہا دوبارہ گنتی کی درخواست بروقت دی گئی،جس کاغذ پر انحصار کیا جارہا اس پر بھی تاریخ درج نہیں۔
تفصیلات کے مطابق سپریم کورٹ میں جسٹس امین الدین خان اور جسٹس نعیم اختر افغان پر مشتمل دو رکنی بینچ نے این اے 97فیصل آباد میں ووٹوں کی دوبارہ گنتی کی لیگی امیدوار علی گوہر بلوچ کی اپیل پر سماعت کی۔
جسٹس نعیم اختر افغان نے ریمارکس دیئے ریکارڈ سے ثابت کریں ریٹرننگ افسر کو دوبارہ گنتی کی درخواست بروقت دی گئی تھی، آپ سپریم کورٹ کے حالیہ فیصلے پر انحصار کر رہے ہیں لیکن سپریم کورٹ نے فیصلے میں دو اصول طے کئے ہیں، سپریم کورٹ نے کہا ہے کہ جب دوبارہ گنتی کی درخواست بروقت آئے تو آر او اس سے انکار نہیں کر سکتا۔
جسٹس نعیم اختر افغان نے کہاکہ سپریم کورٹ نے دوبارہ گنتی کیلئے دونوں امیدواروں میں ووٹوں کے فرق کو بھی بیان کیا ہے، ریکارڈ سے کہیں ثابت نہیں ہو رہا کہ دوبارہ گنتی کی درخواست 9فروری کو آئی تھی، آپ جس کاغذ پر انحصار کر رہے ہیں اس پر تاریخ بھی درج نہیں، کیا ریٹرننگ افسر نے کسی بھی فورم پر تسلیم کیا کہ دوبارہ گنتی کی درخواست آئی تھی؟۔
وکیل حسن رضا نے کہا کہ ریٹرننگ افسر جھوٹ بھی تو بول سکتا ہے جس پر عدالت نے کہا کہ ریٹرننگ افسر نے کہا ہے کہ دوبارہ گنتی کی درخواست بعد میں ذہن میں آنے والی سوچ ہے۔دوران سماعت ڈی جی لاء محمد ارشد عدالت میں پیش ہوئے۔
عدالت نے ان سے مکالمہ کرتے ہوئے کہا کہ آپ کا ریکارڈ کیا کہتا ہے، ڈی جی لاء نے بتایا کہ ہمارے ریکارڈ کے مطابق 9فروری کو دوبارہ گنتی کی درخواست نہیں دائر کی گئی۔بعد ازاں عدالت نے دلائل سننے کے بعد لیگی امیدوار کی دوبارہ گنتی کی اپیل خارج کردی۔
