لاہور: کسٹم حکام نے علامہ اقبال انٹرنیشنل ایئر پورٹ پر کارروائی کے دوران پی آئی اے ایئر ہوسٹس کو غیر ملکی کرنسی سمگل کرتے گرفتار کرلیا۔ تفصیلات کے مطابق کسٹم حکام نے علامہ اقبال انٹرنیشنل ایئرپورٹ پر کارروائی کرتے ہوئے پی آئی اے کی ایئرہوسٹس کو غیر ملکی کرنسی سمگل کرتے رنگے ہاتھوں گرفتار کرلیا۔
حکام نے بتایا کہ ایئرہوسٹس لاہور سے پی آئی اے کی پرواز پر جدہ جارہی تھی، شک پڑنے پر کسٹمز حکام نے ایف آئی اے امیگریشن کے ساتھ مل کر اسے آف لوڈ کرایا اور تلاشی پر سعودی ریال اور امریکی ڈالر برآمد کرلئے۔ ڈپٹی کلکٹر کسٹم راجہ بلال نے بتایا کہ برآمد ہونیوالی رقم میں 37ہزار 318امریکی ڈالرز اور 40ہزار سعودی ریال شامل ہیںجن کی مالیت پاکستانی کرنسی میں لاکھوں روپے بنتی ہے۔
انہوں نے بتایا کہ کرنسی نوٹس ایئر ہوسٹس کی جرابوں اور جسم کے مختلف حصوں سے برآمد ہوئے ہیں۔ انہوں نے کہا کہ کرنسی سمگلنگ کی روک تھام کیلئے وزیراعظم اور چیئرمین ایف بی آر کی ہدایت پر ہر صورت عمل کیا جا رہا ہے،پی آئی اے اعلی افسران کوایئر ہوسٹس کی کرنسی سمگلنگ بارے آگاہ کر دیا گیا ہے جبکہ ایئر ہوسٹس کیخلاف مقدمہ درج کر کے تفتیشی ٹیم کے حوالے کر دیا گیا ہے۔
