وفاقی حکومت نے اسلام آباد میں ایپ بیسڈ ٹیکسی و آن لائن رائیڈ ہیلنگ سروسز کو قانونی دائرے میں لانے کا فیصلہ کر لیا۔
ذرائع کے مطابق آن لائن رائیڈ بکنگ کیلئے نیا قانونی فریم ورک متعارف کرانے بارے بل سینیٹ سے منظور کر لیا گیا ہے۔
بل کے مطابق آن لائن رائیڈ ہیلنگ سروسز سے وابستہ ڈرائیورز کیلئے متعلقہ اتھارٹی سے رجسٹریشن لازمی ہوگی جبکہ بغیر رجسٹریشن اسلام آباد میں کسی بھی رائیڈ سروس کی اجازت نہیں دی جائیگی، رائیڈ ہیلنگ کمپنیوں کو آپریشن شروع کرنے کیلئے باقاعدہ آپریشن سرٹیفکیٹ حاصل کرنا ہوگا۔
بل میں ڈرائیورز کیلئے ویلڈ ڈرائیونگ لائسنس اور خصوصی اجازت نامہ لازم قرار دیا گیا ہے جبکہ گاڑیوں کی رجسٹریشن اور سالانہ فٹنس سرٹیفکیٹ بھی ضروری ہو گا، رائیڈ ہیلنگ کمپنیوں کو ڈرائیورز اور گاڑیوں کا مکمل ریکارڈ محفوظ رکھنا اور متعلقہ حکام کو ریئل ٹائم ڈیٹا فراہم کرنا ہوگا۔
بل کے مطابق قانون سازی کا مقصد مسافروں کے تحفظ کو یقینی بنانا، شفاف نظام قائم کرنا اور رائیڈ ہیلنگ سیکٹر کو منظم کرنا ہے۔
