وزیراعظم شہباز شریف نے کہا ہے کہ پاکستان کو دفاعی میدان کی طرح معاشی میدان میں بھی مضبوط بنانے کیلئے دن رات کام کر رہے ہیں، آزاد کشمیر کی ترقی کیلئے ریاستی حکومت کیساتھ ملکر کام کرینگے۔
مئی میں جنگ کے میدان میں افواج پاکستان نے بھارت کو زناٹے دار تھپڑ رسید کیا جس پر امریکی کانگریس نے بھی مہر لگادی، جنگ کے دوران فیلڈ مارشل نے بلا خوف میری مشاورت سے فیصلے کئے۔
ان خیالات کا اظہار انہوں نے باغ آزادکشمیر میں دانش سکول کا سنگ بنیاد رکھنے کے موقع پر منعقدہ تقریب سے خطاب کرتے ہوئے کیا۔137 کنال پر محیط دانش اسکول میں تقریباً 800 بچے تعلیم حاصل کر سکیں گے۔
دانش سکول میں بچوں اور بچیوں کیلئے الگ الگ کیمپسز بنائے گئے ہیں،سکول میں کھیلوں کی سہولیات، لانڈری، کیفے، ہاسٹل اور ڈیجیٹل لائبریری بھی شامل ہیں۔
افتتاحی تقریب سے خطاب میں وزیراعظم نے کہا کہ باغ میں دانش اسکول کا سنگ بنیاد رکھتے ہوئے خوشی محسوس ہو رہی ہے یہ وہ دانشگاہ ہے جس کا سفر ہم نے پنجاب سے شروع کیا تھا ،آج ملک بھر میں دانش سکولوں کا بننا خوش آئند ہے۔
بھمبر میں دانش سکول کا 35 فیصد کام مکمل ہوچکا ہے اور محکمہ تعلیم کو ہدایت کی گئی ہے کہ باغ کے دانش سکول کا افتتاح 23 مارچ 2026 کو کیا جائے، دانش اسکول کا دائرہ کار وادی نیلم تک پھیلایا جائیگا۔
وزیراعظم نے کہا کہ نومنتخب وزیراعظم آزادکشمیر نے فارورڈ کہوٹہ میں دانش سکول کی فرمائش کی ہے اور انکی خواہش پر وہاں کیلئے تحفے کے طورپر دانش سکول کا اعلان کرتا ہوں، دانش سکول پاکستان کے نامور تعلیمی اداروں کے ہم پلہ ہیں جس میں غریب بچوں کو بہترین تعلیمی سہولیات فراہم کی جا رہی ہیں، دانش سکولوں کے ذریعے تعلیم سے متعلق علامہ اقبال اور قائداعظم کا خواب پورا ہو رہا ہے، دانش سکولوں کا جو خواب دیکھا تھا اسکی تکمیل کا وقت آگیا ہے، یہاں پڑھنے والے بچے پاکستان کا نام روشن کرینگے اور اسے عظیم ملک بنائیں گے ۔
وزیراعظم نے امریکی کانگریس کی رپورٹ کا حوالہ دیتے ہوئے کہا کہ اب تو امریکی صدر بھی تسلیم کرتے ہیں کہ پاکستان نے بھارت کے جدید جنگی جہاز مار گرائے ہیں، پاکستان کو اللہ تعالی نے عزت سے نوازا ہے اور شاہینوں کی کارکردگی نے دشمن کو گھٹنوں کے بل گرنے پر مجبور کیا ہے۔
جنگ میں بری افواج نے الفتح میزائل داغے اور فیلڈمارشل کی قیادت میں بلاخوف مشاورت سے بھرپور فیصلے کیے، افواج کی دلیری اور فتوحات کے باعث پاکستان کا دنیامیں وقار بلند ہوا، پوری دنیا میں ہمارے لئے گرم جوشی کا مظاہرہ کیا جا رہا ہے۔
وزیراعظم نے کہا کہ جو قومیں معاشی طور پر ترقی نہیں کرتیں وہ کامیاب نہیں ہوتیں، ایک دن آئیگا کہ ہماری قرضوں سے جان چھوٹ جائیگی۔
انہوں نے کہا کہ کشمیربنے گا پاکستان اور دانش سکول بھی وہاں تعمیر ہونگے۔ وزیراعظم نے ہدایت کی کہ آزادکشمیر میں گورننس کا مثالی معیار قائم کر تے ہوئے عوام کو بہترین سہولتیں فراہم کی جائیں۔
