وزیر اعظم شہبازشریف نے کہا ہے کہ ہر بچے کو معیاری تعلیم، صحت سہولیات کی فراہمی حکومت کا فرض،نوجوان نسل کی نشوونما و خوشحالی کیلئے کوششیں جاری ہیں، پالیسی سازایسا معاشرہ تشکیل دیں جہاں ہر بچے کی اہمیت ہو اور وہ خود کو محفوظ و قیمتی محسوس کرے،عالمی یوم اطفال پر بچوں کو قومی ترجیحات میں اولیت دینے کا عہد کرنا ہوگا۔عالمی یوم اطفال پر جاری پیغام میں وزیراعظم شہباز شریف نے بچوں کے حقوق، فلاح و بہبود و ترقی کیلئے اپنے عزم کا اعادہ کرتے ہوئے کہا کہ بچے مستقبل کے معمار اور قوم کا سب سے قیمتی اثاثہ ہیں۔انہوں نے کہا کہ یہ دن ہمیں اس اجتماعی ذمہ داری کی یاد دلاتا ہے کہ ہم بلا تفریق ہر بچے کے حقوق کا تحفظ یقینی بنائیں۔انہوں نے کہا کہ ہر بچے کو معیاری تعلیم،صحت کی سہولیات، محفوظ پرورش کرنیوالے ماحول کی فراہمی ہمارا فرض ہے تاکہ وہ اپنی مکمل صلاحیتوں کیساتھ معاشرے میں مثبت کردار ادا کر سکے۔ انہوں نے کہا کہ حکومت نے بچوں کی زندگیاں بہتر بنانے کیلئے متعدد اقدامات اٹھائے ہیں،دانش سکولز دور دراز و پسماندہ علاقوں میں کم وسیلہ بچوں کو معیاری تعلیم فراہم کر رہے ہیں، ان سکولوں نے بے شمار بچوں کی زندگیاں بدل کر روشن مستقبل کی راہ دکھائی۔انہوں نے کہا کہ ہم نے تعلیمی ایمرجنسی کا اعلان کیا ہے جس کے تحت وسائل کو متحرک کرکے خواندگی کی شرح میں اضافہ، سکولوں کی تعمیر نو اور بچوں کو معیاری تعلیم کی فراہمی یقینی بنا ئی جارہی ہے۔انہوں نے کہا کہ خصوصی مہمات کے ذریعے سکول نہ جانے والے لاکھوں بچوں کے داخلے کیلئے کوششیں جاری ہیں۔وزیراعظم نے بتایا کہ غذائی قلت دور کرنے،تعلیمی نتائج کی بہتری کیلئے حکومت نے سرکاری سکولوں میں غذائیت کا پروگرام متعارف کیا ہے تاکہ بچوں کو صحت مند کھانا ملے جو ان کی جسمانی و ذہنی نشوونما میں معاون ہو۔ انہوں نے کہا کہ یہ تمام تر اقدامات اس عزم کی عکاسی کرتے ہیں کہ ہم نوجوان نسل کی نشوونما و خوشحالی کیلئے کوششیں کر رہے ہیں۔انہوں نے کہا کہ والدین، اساتذہ، سول سوسائٹی اور پالیسی سازوں سے اپیل ہے کہ مل کر ایک ایسا معاشرہ تشکیل دیں جہاں ہر بچے کی اہمیت ہو اور وہ خود کو محفوظ و قیمتی محسوس کرے۔انہوں نے کہا کہ عالمی یوم اطفال پر عہد کرنا ہوگا کہ ہم اپنے بچوں کو قومی ترجیحات میں اولیت دیں گے اور ایسا مستقبل یقینی بنائیں گے جہاں وہ عزت، برابری اور امید کیساتھ پروان چڑھ سکیں۔
