بھارت میں ہوائی جہاز میں بم کی موجودگی کی اطلاع نے مسافروں میں ہلچل مچادی جس کے بعد طیارے نے لکھن کے ایئرپورٹ پر ہنگامی لینڈنگ کی۔
غیر ملکی میڈیا کے مطابق انڈیگو ایئرلائنز کی پرواز دہلی سے باگڈوگرا مغربی بنگال جارہی تھی کہ دوران پرواز طیارے کو بم کی اطلاع ملی جس پر طیارے کو لکھن کے چوہدری چرن سنگھ انٹرنیشنل ایئرپورٹ میں ہنگامی طور پر لینڈ کروایا گیا۔
میڈیا رپورٹس کے مطابق پرواز 6E-6650 میں تقریباً 230 افراد سوار تھے، طیارے نے صبح تقریباً 9:17 بجے لکھن میں ہنگامی لینڈنگ کی، جب انکے طیارے کے ٹوائلٹ میں ایک ہاتھ سے لکھا گیا نوٹ برآمد ہوا جس پر طیارے میں بم درج تھا۔
ایئر ٹریفک کنٹرول کو صبح تقریباً 8:46بجے اس خطرے کی اطلاع موصول ہوئی جس کے بعد طیارے کو فوری طور پر لکھن کی جانب موڑ دیا گیا، حکام نے طیارے کو لینڈنگ کے بعد الگ حفاظتی زون میں منتقل کیا اور بم کے خطرے کا جائزہ لینے کیلئے بومب تھریٹ اسیسمنٹ کمیٹی تشکیل دی گئی۔
تمام مسافر اور عملہ محفوظ طور پر طیارے سے اتار لئے گئے،سی آئی ایس ایف، پولیس، بم ڈسپوزل اسکواڈ اور دیگر سکیورٹی ٹیموں نے طیارے کی باریک بینی سے تلاشی لی مگر کسی بھی قسم کا دھماکہ خیز مواد نہیں ملا اور خطرہ بعد میں غلط ثابت ہوا۔
انڈیگو ایئرلائنز کے ترجمان نے بتایا کہ سکیورٹی خطرے کی اطلاع ملتے ہی متعلقہ حکام کو فوری طور پر آگاہ کیا گیا اور طیارے کی لینڈنگ اور تلاشی کے دوران ہر ممکن احتیاط برتی گئی، مسافروں کو ریفریشمنٹس فراہم کئے گئے، انکو باقاعدہ معلومات دی گئیں اور انکی سلامتی اولین ترجیح رہی، تحقیقات جاری ہیں تاکہ یہ معلوم کیا جا سکے کہ نوٹ کو طیارے میں کس نے رکھا اور اس مقصد کا پس منظر کیا تھا، تلاشی کے بعد طیارے کو بم سے پاک قرار دیدیا گیا اور بعد میں یہ اپنی اصل منزل باگڈوگرا کیلئے روانہ ہوا۔
حکام نے کہا کہ یکیورٹی کے تمام معمولات سختی سے نافذ کئے گئے اور ایئرپورٹ پر دن بھر حفاظتی انتظامات جاری رہے۔
