اسلام آباد: ترجمان دفتر خارجہ نے کہا ہے کہ کسی بھی سیاسی جماعت پر پابندی پاکستان کا داخلی معاملہ ہے، دوسر ے ممالک تبصرے سے گریز کریں، پاکستان میں دہشت گردی کیلئے افغان سرزمین کا استعمال قابل تشویش ہے، طالبان حکومت پر حافظ گل بہادر گروپ کیخلاف کارروائی پر زور دیا ہے، مسقط میں امام بارگاہ علی ابن ابی طالب پر حملہ قابل مذمت ہے،خان یونس میں اسرائیلی حملے میں 19 فلسطینیوں کی شہادت یو این قوانین کی خلاف ورزی ہے، سرینگر میں محرم جلوس کے عزا داروں کو فوری رہاء کیا جائے۔
تفصیلات کے مطابق ہفتہ وار پریس بریفنگ دیتے ہوئے ترجمان دفتر خارجہ ممتاز زہرا بلوچ نے کہا کہ کسی سیاسی جماعت پر پابندی پاکستان کا داخلی معاملہ ہے، دوسرے ممالک کو اس پر تبصروں سے گریز کرنا چاہئے، پاکستان اپنے اندرونی مسائل خود حل کرسکتا ہے۔
انہوں نے کہا کہ پاکستان میں دہشت گردی کیلئے افغان سرزمین کا استعمال قابل تشویش ہے،پاکستان نے بنوں چھاؤ نی پر تحریک طالبان پاکستان کے حملے بارے تحفظات افغان عبوری حکومت کو پہنچا دئیے ہیں انہوں نے کہا کہ افغان حکومت کیساتھ صاف بات چیت کی ہے، ہم نے طالبان حکومت پر حافظ گل بہادر گروپ کے خلاف موثر اور فوری کارروائی کرنے پر زور دیا ہے۔
انہوں نے کہا کہ پاکستان نے افغانستان کیساتھ ہشت گرد گروپس اور حملہ آوروں کے خلاف انٹلیجنس معلومات شیئر کی ہیں، ہم گزشتہ کئی ماہ سے افغانستان کے ساتھ مسلسل رابطے میں ہیں۔انہوں نے بتایا کہ پاکستان کے امیگریشن قوانین واضح ہیں خلاف ورزی کرنے والے کو نکالا جاتا ہے، روزانہ کی بنیاد پر غیر قانونی مقیم افغان شہریوں کو ڈی پورٹ کیا جاتا ہے۔
انہوں نے کہا کہ پاکستان میں 44ہزار افغان شہری تیسرے ملک جانے کیلئے انتظار میںہیں، اس بارے ملالہ یوسفزئی کے بیان کا علم نہیں ہے ، امید ہے ملالہ یوسفزئی تیسرے ملک پر زور دیں گی کہ ان افغان شہری کو جلدی بلایا جائے ۔انہوں نے کہا کہ پاکستان 9 محرم کو امام بارگاہ علی ابن ابی طالب مسقط پر حملے کی مذمت کرتا ہے، یہ دہشت گردی کا بہیمانہ واقعہ ہے ،ہم اپنے بھائیوں اور بہنوں کے ساتھ کھڑے ہیں، اس واقعے سے دہشت گردی کے خلاف مل کر مقابلہ کرنے کی اہمیت پتہ چلتی ہے۔
انہوں نے بتایا کہ ترکمانستان کے وزیر خارجہ رشید میرادوف جلد پاکستان کا دورہ کریں گے، دورے میں دوطرفہ تعلقات کے بارے میں تفصیلی بات چیت ہو گی۔ایک سوال پر انہوں نے کہا کہ پاکستان فلسطینی مہاجرین کیمپوں پر اسرائیل کے حملے کی مذمت کرتا ہے، خان یونس مہاجر کیمپ حملے میں 19 فلسطینیوں کی شہادت اقوام متحدہ کے قوانین کی خلاف ورزی ہے۔
انہوں نے کہا کہ پاکستان سرینگر میں محرم کے جلوس کے شرکاء کی گرفتاریوں کی مذمت اور گرفتار عزاداروں کی فوری رہائی کا مطالبہ کرتا ہے، ہم کشمیریوں کی سیاسی اور اخلاقی مدد جاری رکھیں گے۔
