پاکستان کی فلم انڈسٹری ایک اور اہم تکنیکی سنگ میل کی جانب بڑھ رہی ہے، جہاں ایک انوکھا تجربہ کرتے ہوئے مصنوعی ذہانت (اے آئی) کی مدد سے ایک فلم تیار کی گئی ہے، دی نیکسٹ صلاح الدین کو 19 دسمبر کو ملک بھر کے سنیما گھروں میں نمائش کیلئے پیش کیا جائیگا اور امید کی جارہی ہے کہ مصنوعی ذہانت سے تیار فلم نئی تاریخ رقم کر یگی۔
فلم کے خالق مصنف اور ہدایتکار فرحان صدیقی نے منصوبے کا اعلان ایک پریس کانفرنس کے دوران کیا اور اسے پاکستانی سنیما کیلئے ایک انقلابی تجربہ قرار دیا، فلم فلسطین کے مظلوم عوام سے اظہارِ یکجہتی کے طور پر بنائی گئی ہے اور اسکا مقصد دنیا بھر کے ناظرین تک امن، وقار اور انسانی حقوق کا طاقتور پیغام پہنچانا ہے، فلم کی تیاری میں مصنوعی ذہانت نے مرکزی کردار ادا کیا ہے، سکرپٹ رائٹنگ، بصری تشکیل اور کرداروں کی تخلیق سمیت مختلف مراحل میں اے آئی ٹیکنالوجی کا استعمال کیا گیا ہے۔
میڈیا سے گفتگو کرتے ہوئے فرحان صدیقی نے کہا یہ پاکستانی سنیما کیلئے بالکل نیا تجربہ ہے اور دی نیکسٹ صلاح الدین کہانی سنانے کے عمل میں جدید ٹیکنالوجی کو شامل کرنے کی ایک جراتمندانہ کوشش ہے۔
