اقوام متحدہ کے بچوں کے ادارے یونیسف نے غزہ میں بچوں کی بگڑتی صورتحال پر گہری تشویش کا اظہار کرتے ہوئے خبردار کیا ہے کہ اگر فوری طور پر موسم سرما سے بچائو کے اقدامات نہ کئے گئے تو نومولود اور کم عمر بچوں کی اموات میں مزید اضافہ ہو سکتا ہے، جنگ سے تباہ حال غزہ میں شدید سردی، بارش اور طوفانی موسم نے انسانی بحران کو مزید سنگین بنا دیا ہے، بے گھر خاندان فلسطینی خیموں میں رہنے پر مجبور ہیں جہاں مناسب پناہ، گرم کپڑوں، خوراک اور طبی سہولتوں کی شدید کمی ہے، سردی کی وجہ سے بچوں کے بیمار ہونیکا خطرہ ہے، کیمپ بچوں کیلئے خوفناک صورت اختیار کر چکے ہیں، لاکھوں بچے پانی سے بھرے خیموں میں زندگی گزارنے پر مجبور ہیں، انکے پاس گرم کپڑے موجود نہیں، غزہ میں بچوں کیلئے محفوظ پناہ گاہیں بنانے کی ضرورت ہے۔
فلسطین میں یونیسف کے کمیونی کیشن چیف جوناتھن کرکس نے کہا کہ خیموں میں رہنے والے بچوں کے کمبل اور کپڑے بھیگ چکے ہیں اور کئی بچوں کے پاس پہننے کیلئے صرف ایک یا دو جوڑے کپڑے ہیں جس سے انہیں خشک اور گرم رکھنا تقریبا ًناممکن ہو گیا ہے۔
انہوں نے کہا کہ سردی نے غزہ میں تباہی مچا دی، بچوں کی اموات کا خطرہ بڑھ گیاہے، بے گھر خاندان خیموں میں رہنے پر مجبور ہیں جہاں مناسب پناہ، گرم کپڑوں، خوراک اور طبی سہولتوں کی شدید کمی ہے۔
یونیسف نے عالمی برادری سے مطالبہ کیا ہے کہ غزہ میں بچوں اور خاندانوں کے لیے فوری امداد، گرم کپڑے، محفوظ پناہ گاہیں اور طبی سہولتیں فراہم کی جائیں تاکہ مزید جانی نقصان سے بچا جا سکے۔
