تربیلا ڈیم کی تعمیر کے 50 سال مکمل ہونے پر واپڈا ہاؤس لاہور میں تقریب میں انعقاد کیا گیا جس میں پاکستان پوسٹ کی جانب سے 50 روپے کا یادگاری ٹکٹ جاری کیا گیا۔ تقریب سے خطاب کرتے ہوئے چیئرمین واپڈا انجینئرلیفٹیننٹ (ر)جنرل سجاد غنی نے خطاب کرتے ہوئے کہا کہ تربیلا ڈیم پاکستان کی انجینئرنگ میں مہارت اور قومی ترقی کی علامت ہے، یاد گاری ڈاکٹ ٹکٹ ہماری آئندہ نسلوں کو تربیلا ڈیم کی اہمیت یاد دلاتا رہے گا۔ انہوں نے کہا کہ انجینئرنگ کا شاہکار تربیلا ڈیم 1974ء کی تیسری سہ ماہی میں مکمل ہوا، ڈیم گزشتہ 50سال سے پاکستان کی معاشی و معاشرتی ترقی کا اہم ترین جزو ہے۔انہوں نے کہا کہ تربیلا ڈیم سے گزشتہ 50سال میں زراعت کیلئے 406ملین ایکڑ فٹ پانی مہیا کیا جاچکا ہے جبکہ تربیلا ہائیڈل پاورسٹیشن نیشنل گرڈ کو 540ارب 36کروڑ یونٹ سستی پن بجلی فراہم کر چکا ہے۔ انہوں نے بتایا کہ تربیلا ڈیم گزشتہ 50برس میں قومی اقتصادیات کو 400ارب ڈالر سے زائد کا فائدہ بھی پہنچا چکا ہے۔
