اسلام آ باد: نائب وزیر اعظم اور وزیر خارجہ، سینیٹر محمد اسحق ڈار وفد کے ہمراہ کابل پہنچ گئے، جہاں وہ ازبکستان-افغانستان-پاکستان (یو اے پی)ریلوے منصوبے کے لیے مشترکہ فزیبلٹی اسٹڈی پر فریم ورک معاہدے پر دستخط کی تقریب میں شرکت کریں گے۔
دفتر خارجہ کے مطابق نائب وزیر اعظم و وزیر خارجہ کے ہمراہ اعلی سطحی وفد میں وزیر برائے ریلوے، افغانستان کے لیے وزیر اعظم کے معاون خصوصی، نمائندہ خصوصی اور سیکریٹری وزارت ریلوے شریک ہیں۔ اپنے دورے کے دوران اسحق ڈار افغان قائم مقام وزیر خارجہ سے ملاقات کریں گے اور افغانستان کے قائم مقام وزیر اعظم سے بھی ملاقات کریں گے تاکہ دو طرفہ امور پر بات چیت کی جا سکے اور علاقائی و عالمی پیش رفت پر خیالات کا تبادلہ کیا جا سکے۔
واضح رہے یو اے پی ریلوے منصوبے کا مقصد ازبکستان کو افغانستان کے راستے پاکستان سے ریل کے ذریعے منسلک کرنا ہے تاکہ وسطی ایشیائی ممالک کو پاکستانی بندرگاہوں تک رسائی حاصل ہو سکے، منصوبے سے علاقائی تجارت اور ٹرانزٹ کو فروغ دے کر خطے میں استحکام، ترقی اور خوشحالی کا باعث بننے کی توقع ہے۔
