دفتر خارجہ نے کہا ہے کہ پاکستان کو سرحد پار سے سرگرم دہشتگرد عناصر کی جانب سے مستقل خطرات کا سامنا ہے جبکہ بعض دہشتگرد گروہوں کو ہمارے مخالفین کی مسلسل معاونت حاصل ہے۔
ترجمان دفتر خارجہ نے کہا کہ پاکستان دہشتگردی کیخلاف جنگ میں دنیا کے سب سے زیادہ متاثر ہونیوالے ممالک میں شامل ہے، دہشتگردی کیخلاف جنگ اور امن و سلامتی کیلئے قوم نے بے مثال قربانیاں دی ہیں، پاکستان میں اس جنگ میں اب تک 90 ہزار سے زائد قیمتی جانوں کا نقصان ہو چکا ہے، یہ قربانیاں دہشتگردی کیخلاف پاکستان کے کردار اور غیر متزلزل عزم کی زندہ یاد دہانی ہیں، ان قربانیوں نے نہ صرف پاکستانی عوام بلکہ پورے خطے اور اس سے باہر بھی بے شمار قیمتی جانیں بچائی ہیں۔
انہوں نے کہا کہ سانحہ آرمی پبلک سکول کے معصوم بچوں کی قربانی دہشتگردی کیخلاف پاکستان کے قومی عزم کی ایک روشن اور ناقابلِ فراموش علامت ہے، پاکستان کی سکیورٹی فورسز اور قانون نافذ کرنیوالے ادارے دہشتگردوں کیخلاف مسلسل فیصلہ کن اور مثر کارروائیاں کر رہے ہیں۔
انہوں نے واضح کیا کہ پاکستان دہشتگردی کے مکمل خاتمے کیلئے پرعزم ہے، عالمی برادری دہشتگردی کیخلاف پاکستان کی قربانیوں اور کوششوں کا اعتراف کرے اور اس چیلنج سے نمٹنے کیلئے تعاون کو فروغ دے۔
