وزیراعلی پنجاب مریم نواز نے صوبے کے بے گھر صنعتی ورکرز کیلئے نئے تعمیر کردہ 720 فلیٹس کی قرعہ اندازی کر دی۔
منگل کو اس حوالے سے منعقدہ تقریب میں وزیراعلی نے بٹن دبا کر قرعہ اندای عمل کا آغاز کیا، مریم نواز نے فلیٹ نکلنے پر ندیم طاہر نامی صنعتی کارکن کو خود فون کرکے مبارکباد دی اور والدین کو ساتھ رکھنے کی تلقین کی۔
صنعتی کارکنوں کیلئے مزید 1872 فلیٹس آئندہ 18 ماہ میں مکمل ہوں گے۔
وزیراعلی نے بیوگان اور سپیشل افراد کو قرعہ اندازی سے الگ کر کے فلیٹ دینے کا حکم دیا۔
وزیراعلی نے شیخوپورہ میں قائداعظم بزنس پارک میں 700 ورکرز کیلئے بیچلر ہاسٹل کی 3 ماہ میں تکمیل کی ہدایت کی جبکہ سپیشل صنعتی کارکنوں کی آسانی و تحفظ کیلئے گرائونڈ فلور پر فلیٹس دینے کا حکم دیا۔
ذرائع کے مطابق سندر فیز ٹوکیلئے 672 فلیٹس، ملتان میں 656 اور وار برٹن ننکانہ صاحب میں 544 فلیٹس صنعتی کارکنوں کو دیئے جائیں گے۔
جھنگ میں 1300 اور کمالیہ میں 700 صنعتی ورکرز کو انفراسٹرکچر ڈویلپمنٹ کے بعد مفت پلاٹ دیئے جائینگے۔
