وزیراعلی خیبرپختونخوا سہیل آفریدی نے ایل آر ایچ میں نومولود کے علاج نہ ہونے کا نوٹس لیتے ہوئے عوام کی شکایات کے ازالے کیلئے شکایت سیل قائم کرنے کا اعلان کردیا۔
ذرائع کے مطابق ایل آر ایچ میں نومولود بچے کا علاج نہ ہونے کی ویڈیو سوشل میڈیا پر وائرل ہوئی تو وزیراعلی نوٹس لیتے ہوئے رات گئے ہسپتال پہنچ گئے اور صورتحال کا خود جائزہ لیا، وزیراعلی کی آمد پر مریضوں اور تیمارداروں نے شکایات کے انبار لگا دیئے۔
شہریوں نے کہا کہ ہم مریض لے کر آتے ہیں مگر ڈاکٹر موبائل فون پر مصروف رہتے ہیں، مریضوں کا بروقت معائنہ نہیں کیا جاتا اور گھنٹوں کھڑے رہنا پڑتا ہے۔
وزیراعلی سہیل آفریدی نے سخت برہمی کا اظہار کرتے ہوئے واضح ہدایات جاری کیں کہ دوران ڈیوٹی کوئی ڈاکٹر یا افسر موبائل فون استعمال نہیں کرے گا، اگر کوئی خلاف ورزی کرتے پایا گیا تو اس کے خلاف سخت کارروائی کی جائے گی۔
انہوں نے عوام سے اپیل کی کہ اگر کسی ڈاکٹر یا عملے کو ڈیوٹی کے دوران موبائل استعمال کرتے دیکھیں تو اس کی ویڈیو بنا کر بھیجیں، عوام کے علاج میں غفلت کسی صورت برداشت نہیں کی جائے گی۔
وزیراعلی نے اعلان کیا کہ شکایات کے ازالے کیلئے وزیراعلی شکایت سیل قائم کیا جا رہا ہے جہاں شہری براہِ راست اپنی شکایات درج کرا سکیں گے۔
انہوں نے ہسپتال انتظامیہ کو مریضوں کو فوری و معیاری طبی سہولیات فراہم کرنے کی ہدایات جاری کیں۔
