اے این ایف نے ملک گیر 7 کارروائیوں میں 2 کروڑ 25 لاکھ روپے سے زائد مالیت کی 175.53 کلو گرام منشیات برآمد کر کے 9 ملزمان گرفتار کرلئے۔
ترجمان کے مطابق تعلیمی اداروں میں کارروائیوں کے دوران گلگت میں سکول کے قریب ملزم سے 450 گرام چرس برآمد ہوئی، گرفتار ملزم نے تعلیمی اداروں کے طلبا کو منشیات فروخت کرنے کا اعتراف کیا جبکہ کلفٹن کراچی میں کوریئر آفس میں نیوزی لینڈ جانیوالے پارسل سے کارپٹ میں جذب 21.6 کلو آئس، ساہیانوالہ ٹول پلازہ فیصل آباد کے قریب گاڑی سے 80.4 کلو گرام چرس اور 60 کلو گرام افیون برآمد کرکے 2 ملزمان کو گرفتار کیا گیا۔
ترجمان کے مطابق بیلا روڈ اسلام آباد پر ملزم کے قبضے اور گھر سے 9.6کلوگرام چرس برآمد ہوئی، موٹر وے ٹول پلازہ اسلام آباد کے قریب 2ملزمان سے 140 گرام کوکین اور 140گرام آئس برآمد کی گئی۔
ترجمان کے مطابق گرفتار ملزمان کیخلاف انسداد منشیات ایکٹ کے تحت مقدمات درج کر کے تحقیقات شروع کردی گئی ہیں۔
