وزیراعظم شہباز شریف نے دہشت گردی کیخلاف کارروائیاں جاری رکھنے کے عزم کا اعادہ کرتے ہوئے کہا ہے کہ پاکستان سے ناسور کا مکمل خاتمہ ہی سانحہ اے پی ایس کا حقیقی انصاف ہوگا، جدوجہد ختم نہیں ہوئی، آخری دہشت گرد کے خاتمے تک چین سے نہیں بیٹھیں گے۔
سانحہ آرمی پبلک ایس پشاور کی گیارہویں برسی پر جاری بیان میں وزیراعظم نے کہا کہ آج پوری قوم ان شہدا کو خراج عقیدت پیش کرتی ہے جنہوں نے وطن عزیز کے مستقبل کیلئے اپنی قیمتی جانوں کا نذرانہ پیش کیا۔
انہوں نے کہا کہ یہ دلخراش سانحہ پوری قوم کیلئے ایک عظیم آزمائش تھا جس نے دلوں کو غم سے بھر دیا مگر قومی حوصلے کو پست نہ کر سکا۔
وزیراعظم نے کہا کہ اے پی ایس کے معصوم بچوں، اساتذہ اور عملے کی قربانیاں ہمیشہ قومی یادداشت کا حصہ رہیں گی۔
انہوں نے کہا کہ پوری قوم شہدا کے لواحقین کے غم میں برابر کی شریک ہے اور ان کے صبر و استقامت کو سلام پیش کرتی ہے۔
انہوں نے کہا کہ آج جب پاکستان ایک بار پھر دہشت گردی کے ناسور کا سامنا کر رہا ہے اور ملک کے مختلف حصوں میں سیکیورٹی اہلکاروں اور معصوم شہریوں کو نشانہ بنایا جا رہا ہے تو سانحہ اے پی ایس اس حقیقت کی یاد دہانی کراتا ہے کہ دہشت گردی کے خلاف جدوجہد ابھی ختم نہیں ہوئی، پاکستانی سرزمین سے دہشت گردی کا مکمل خاتمہ ہی سانحے کا حقیقی انصاف ہے۔
وزیراعظم نے کہا کہ آج اس عہد کی تجدید کی جاتی ہے کہ دہشت گردی کے خلاف زیرو ٹالرنس پالیسی کے تحت پوری قوت کے ساتھ بھرپور کارروائیاں جاری رکھی جائیں گی اور آخری دہشت گرد کے خاتمے تک چین سے نہیں بیٹھا جائے گا۔
وزیراعظم نے کہا کہ دعاء ہے اللہ تعالی جنگ کے تمام شہدا کو جنت الفردوس میں اعلی مقام اور لواحقین کو صبرجمیل عطا فرمائے ۔
