وزیراعلی خیبرپختونخوا علی امین گنڈا پور نے شہدائے اے پی ایس کی قربانی کو ناقابل فراموش قرار دیتے ہوئے کہا ہے کہ اندوہناک سانحہ نے ملک میں دیر پا امن کی بنیاد رکھی،قوم، حکومت اور اداروں کو مشترکہ دشمن کے خلاف متحد کیا ۔سانحہ اے پی ایس کی 10ویں برسی کے موقع پر اپنے بیان میں وزیراعلی خیبر پختونخوا علی امین گنڈا پور نے کہا کہ آرمی پبلک سکول پشاور کا دلخراش واقعہ ملکی تاریخ کا اندوہناک سانحہ ہے جس نے ہر ایک آنکھ کو اشکبار کیا ۔
انہوں نے کہا کہ شہدائے اے پی ایس کا غم آج بھی ہمارے دلوں میں زندہ ہے اور ہمیشہ زندہ رہے گا، آج کا دن ہمیں اس المیہ کی یاد دلاتا ہے جب انسانیت کے دشمنوں نے ننھے اور معصوم بچوں کو بے دردی سے قتل کیا۔ انہوں نے کہا کہ اس اندوہناک سانحہ نے ملک میں دیر پا امن کی بنیاد رکھی،قوم، حکومت اور اداروں کو مشترکہ دشمن کے خلاف متحد کیا ،سانحے کے بعد سیاسی اور عسکری قیادت نے مل بیٹھ کر نیشنل ایکشن پلان بنایا جو پرامن پاکستان کی طرف درست اور بروقت اقدام ثابت ہوا۔ انہوں نے کہا کہ شہدائے اے پی ایس نے قربانی کی ایک ایسی داستان رقم کی جو کبھی فراموش نہیں کی جا سکے گی۔
