اسلام آباد: صدر آصف زرداری نے کہا ہے کہ ملکی تعمیروترقی، خوشحالی کیلئے نوجوانوں کو مواقع،وسائل کی فراہمی ہمارا فرض ہے،ہر نوجوان دستیاب مواقع سے فائدہ اٹھائے، بڑے خواب دیکھے اور،ملکی بہتری کیلئے انتھک محنت کرے۔
تفصیلات کے مطابق نوجوانوں کے عالمی دن کے موقع پر جاری بیان میں صدر آصف زرداری نے کہا ہے کہ پاکستان کے متحرک نوجوانوں کو دلی مبارکباد پیش کرتا ہوں، نوجوان ہمارے مستقبل کی ضمانت ہیں، پاکستانی نوجوان ہمارا سب سے قیمتی اثاثہ ہیں کیوں کہ وہ مستقبل کے خواب دیکھنے والے اور لیڈر ہیں۔انہوں نے کہا کہ ہمارا فرض ہے کہ نوجوانوں کو صلاحیتیں نکھارنے، خوشحال، پرامن اور ترقی پسند پاکستان کی تعمیر کیلئے مواقع اور وسائل فراہم کریں۔
انہوں نے کہاکہ مجھے اپنے نوجوانوں کی کامیابیوں پر فخر ہے، نوجوانوں کی توانائی، تخلیقی صلاحیت اور استقلال ہماری قوم کی کامیابی کا محرک ہیں۔انہوں نے کہا کہ ہمیں اپنے نوجوانوں پر سرمایہ کاری، انہیں تربیت فراہم کرنے، ڈیجیٹل مہارتوں سے لیس کرکے صلاحیتوں سے بھرپور استفادہ حاصل کرنے کی ضرورت ہے۔
انہوں نے کہا کہ ہر پاکستانی نوجوان اپنے لئے دستیاب مواقع سے فائدہ اٹھائے، بڑے خواب دیکھے اور اپنے ملک کی بہتری کیلئے انتھک محنت کرے۔
انہوں نے کہا کہ آج ہم نہ صرف نوجوان نسل کی صلاحیتوں کا اعتراف کرتے ہیں بلکہ ملکی ترقی میں ان کے کردار کو بھی سراہتے ہیں۔انہوں نے کہا کہ آئیے مل کر اپنے نوجوانوں کی نشوونما اور مدد کریں کیونکہ پاکستان کا مستقبل ان کی کامیابی میں مضمر ہے۔
