بھارت کے معروف کامیڈین اور اینٹرٹینر کپل شرما امیر ترین بھارتی فنکاروں کی صف میں شامل ہوگئے ہیں اور انکی مجموعی دولت کا تخمینہ تقریباً 300 کروڑ بھارتی روپے لگایا گیا ہے۔
حال ہی میں انکی مالی دولت کی تفصیلات پہلی بار منظرِ عام پر آ ئی ہیں جس کے مطابق 300 کروڑ بھارتی روپے کی دولت رکھنے والے کپل شرما بھی بھارتی انٹرٹینمنٹ انڈسٹری کے امیر ترین فنکاروں میں شمار کئے جا رہے ہیں۔
غیر ملکی میڈیا کے مطابق پنجاب سے تعلق رکھنے والے کپل شرما کو والد کی موت کے بعد کم عمری میں ہی گھریلو ذمہ داریاں سنبھالنا پڑیں، ابتدائی دنوں میں انہوں نے ایک پی سی او بوتھ اور ٹیکسٹائل مل میں معمولی ملازمتیں بھی کیں تاہم انکی زندگی اسوقت بدل گئی جب انہوں نے دی گریٹ انڈین لافٹر چیلنج جیتا، اس کامیابی نے انہیں شہرت کی بلندیوں تک پہنچایا اور کامیڈی سرکس اور کامیڈی نائٹس ود کپل جیسے مقبول شوز کے دروازے کھل گئے۔
کپل شرما کے کیریئر کو نئی بلندی اسوقت ملی جب انہوں نے نیٹ فلکس کے شو دی گریٹ انڈین کپل شو کی میزبانی شروع کی جہاں وہ مبینہ طور پر فی قسط 5 کروڑ بھارتی روپے تک معاوضہ وصول کرتے ہیں۔
ٹی وی کے علاوہ وہ فلمی دنیا میں بھی سرگرم ہیں، ممبئی میں مقیم کپل شرما لگژری رہائشگاہوں اور قیمتی گاڑیوں کے مالک ہیں جبکہ کینیڈا میں ایک کیفے بھی چلا رہے ہیں۔
