پاکستان کے فاسٹ بولر شاہین شاہ آفریدی نے کہا ہے کہ چند سال سے بگ بیش کھیلنے کا موقع نہیں ملا لیکن اب کھیلنے کیلئے پرجوش ہیں۔
برسبین ہیٹ کی نمائندگی کرنیوالے شاہین آفریدی نے بِگ بیش لیگ سے متعلق انٹرویو میں کہا کہ اسوقت کوئی قومی ڈیوٹی نہیں ہے، امید ہے مکمل لیگ کھیلنے کا موقع ملے گا۔
انہوں نے کہا کہ آسٹریلیا میں کافی پاکستانی فینز ہیں، مختلف پاکستانی کھلاڑی بگ بیش لیگ کھیل رہے ہیں، امید کررہا ہوں بگ بیش میں پاکستان کی طرح فلیٹ پچز نہیں ہونگی، انکا کہنا تھا کہ محمد رضوان اور بابراعظم کیساتھ عرصے سے قومی ٹیم اور پی ایس ایل میں کھیل رہا ہوں، بابر اعظم ورلڈ کلاس کھلاڑی ہیں، انکی کور ڈرائیو خوبصورت ہے، وہ زیادہ سٹرائیک روٹیشن کو ترجیح دیتے ہیں، محمد رضوان کو فاسٹ بولنگ پسند ہے، وہ بابر اعظم سے مختلف بیٹنگ کرتے ہیں۔
شاہین آفریدی نے کہا کہ گابا میں انٹرنیشنل میچز کھیل چکا ہوں، گابا کی پچ میں کافی اچھال ہوتا ہے، میں نے پاکستان سپرلیگ سے قبل ڈومیسٹک میں کپتانی نہیں کی تھی، ثمین رانا نے مجھے کافی گائیڈ کیا، لاہور قلندرز مجھے اپنی فرنچائز لگتی ہے۔
شاہین آفریدی نے کہا کہ بطور کپتان کھلاڑیوں پر اونچا نہیں بولنا چاہئے اس سے دیکھنے والوں پر تاثر اچھا نہیں جاتا۔
