وزیر مملکت داخلہ طلال چودھری نے کہا ہے کہ دہشتگرد تنظیمیں سوشل میڈیا کا استعمال کر رہی ہیں، حکومت آزادی اظہار رائے پر یقین رکھتی ہے مگر کچھ عناصر ملکی سلامتی کے درپے ہیں، پی ٹی آئی سوشل میڈیا اکائونٹس ٹرینڈ بنانے کیلئے استعمال ہو رہے ہیں۔
وفاقی دارالحکومت میں پریس کانفرنس کرتے ہوئے طلال چودھری کا کہنا تھا کہ سوشل میڈیا پر اداروں کیخلاف مذموم مہم چلائی جا رہی ہے، ملکی خودمختاری پر کوئی سمجھوتہ نہیں کیا جائیگا۔
انکا کہنا تھا کہ ایک ایک ٹویٹ کے پیسے وصول کرکے ٹرینڈ بنائے جاتے ہیں، آزادی اظہار رائے کی بھی کچھ حدود ہیں، چند کمپنیوں کو ٹرینڈ اور ہیش ٹیگز کی بولیاں لگا کر بیچے جاتے ہیں، پی ٹی آئی کے سوشل میڈیا اکائونٹس بیرون ملک سے چلائے جارہے ہیں زیادہ اکانٹس نارتھ امریکا، یورپ، جنوبی ایشیا سے آپریٹ ہو رہے ہیں، یہی اکانٹس ٹی ٹی پی، بی ایل اے اور اسرائیل کے حق میں ٹرینڈز بناتے ہیں، ہمارے پاس بہت ساری معلومات آچکی ہے، ہم نے تمام شواہد جمع کر لئے ہیں، بیرون ملک سے فنڈنگ ٹرانسفر کی جاتی ہے، بیرون ممالک کی کمپنیوں کے جعلی اکانٹس زیادہ ہیں، اِنکو خبردار کرتے ہیں باز نہ آئے تو سخت ایکشن ہوگا۔
