پاکستان نے سوڈان کے شہر کدوگلی میں اقوام متحدہ کے امن اہلکاروں پر حملے کی سخت مذمت کرتے ہوئے عالمی برادری کیساتھ مل کر امن اہلکاروں کی حفاظت و سلامتی یقینی بنانے کیلئے کام جاری رکھنے کا عزم کیا ہے۔
وزارت خارجہ کی جانب سے جاری بیان میں کہا گیا ہے کہ پاکستان سوڈان کے شہر کدوگلی میں ہونیوالے حملے میں اقوام متحدہ کی عبوری سیکیورٹی فورس برائے ابیئی کے تحت خدمات انجام دینے والے 6 بنگلہ دیش امن اہلکاروں کی ہلاکت و متعدد کے زخمی ہونے کی شدید الفاظ میں مذمت کرتا ہے۔
دفتر خارجہ کے مطابق پاکستان بنگلہ دیشی حکومت و عوام سے گہرے دکھ و افسوس کا اظہار اور المناک گھڑی میں جاں بحق اہلکاروں کے لواحقین کیساتھ مکمل یکجہتی کا اظہار کرتا ہے۔
بیان میں کہا گیا ہے کہ اقوام متحدہ کے امن اہل کار دنیا بھر میں تنازعات کی روک تھام، شہریوں کے تحفظ اور امن کے فروغ کیلئے صف اول میں کردار ادا کر رہے ہیں، پاکستان امن و استحکام کیلئے جانوں کا نذرانہ پیش کرنیوالے اہلکاروں کو خراجِ عقیدت پیش کرتا ہے۔
پاکستان نے بزدلانہ حملے کی فوری تحقیقات کا مطالبہ کرتے ہوئے کہا ہے کہ حملے میں ملوث عناصر کی نشاندہی کی جائے اور انہیں انصاف کے کٹہرے میں لایا جائے۔
ترجمان کے مطابق پاکستان اقوام متحدہ کی سلامتی کونسل کے اراکین اور عالمی برادری کیساتھ مل کر امن اہلکاروں کی حفاظت اور سلامتی کو یقینی بنانے کیلئے کام جاری رکھے گا۔
