عدالت نے ٹریفک پولیس اہلکار کو مارنے، خوف و ہراس پھیلانے میں ملوث برطانوی نژاد پاکستانی شہری کی درخواست ضمانت خارج کردی۔
پیر کو اے ٹی سی اسلام آباد میں جج انوالحسنات ذوالقرنین نے ملزم عاقب خان کی درخواست ضمانت پر سماعت کی، وکیل صفائی نے موقف اپنایا کہ میرا موکل برطانوی شہری ہے اس کو پاکستانی قوانین کا علم نہیں تھا، یہ دہشتگردی کا کیس ہی نہیں بنتا پولیس نے جھوٹ پر مبنی مقدمہ درج کیا۔
پراسیکیوٹر راجہ نوید نے کہا کہ غیر ملکیوں کو پاکستانی قوانین کی زیادہ پاسداری کرنی چاہئے، ملزم سے اسلحہ برآمد ہوا جس سے ثابت ہوتا ہے اس نے ٹریفک اہلکار کو جان سے مارنا تھا۔
پراسیکیوٹر نے کہا کہ کمرشل ایریا میں ملزم نے خوف و ہراس پھیلایا جس کی ویڈیو ثبوت موجود ہے، مختلف عدالتی نذیریں موجود ہیں پبلک مقامات پر خوف و ہراس پھیلانا دہشتگردی بنتی ہے۔
عدالت نے دلائل سننے کے بعد ملزم کی درخواست ضمانت خارج کر دی۔
