وزیراعظم شہباز شریف نے کہا ہے کہ معیشت کی مجموعی ترقی، صنعت و تجارت اور دیگر شعبوں کی بہتری میں نجی شعبے کے ماہرین سے مشاورت حکومت کے معاشی اصلاحات کا حصہ ہے، پاکستان ریلویز قلیل وسائل کے باوجود نہایت تندہی اور محنت سے موثر کارکردگی دکھا رہا ہے جس پر وزیر ریلویز اور انکی پوری ٹیم لائق تحسین ہے۔
ان خیالات کا اظہار انہوں نے پاکستان ریلویز کی کارکردگی کو مزید موثر بنانے اور جاری اصلاحات و ترقیاتی کاموں کے حوالے سے نجی شعبے کے ماہرین کیساتھ ایک مشاورتی اجلاس کی صدارت کرتے ہوئے کیا۔
وزیراعظم نے کہا کہ پاکستان ریلویز میں ادارہ جاتی اور انتظامی اصلاحات دہائیوں سے ناگزیر تھیں، ان اصلاحات کے ذریعے ادارے کو مزید منافع بخش بنایا جا سکتا ہے جو ملکی صنعت و تجارت کے فروغ اور سرمایہ کاروں کی سہولت میں کلیدی کردار ادا کریگا۔
وزیراعظم نے ہدایت کی کہ پاکستان ریلوے تمام متعلقہ اکائیوں اور اداروں سے بامعنی مشاورت کے بعد عملی اقدامات پر مشتمل جامع روڈ میپ اگلے ہفتے پیش کرے۔
انہوں نے کہا کہ پاکستان ریلوے کی معاشی ترقی اور علاقائی تعاون میں اہمیت کے پیش نظر حکومت نے انقلابی اقدامات کا سلسلہ شروع کیا ہے، جن کے اطمینان بخش نتائج سامنے آ رہے ہیں۔
وزیراعظم نے افسوس کا اظہار کرتے ہوئے کہاکہ پاکستان ریلویز سے متعلق ترقیاتی منصوبوں کیلئے حکومتی فنڈز کی دستیابی کو دہائیوں تک نظر انداز کیا گیا تاہم اگلے سال کے پی ایس ڈی پی میں ریلویز کے ترقیاتی منصوبوں کیلئے متناسب بجٹ فراہم کیا جائیگا۔
انہوں نے پاکستان ریلویز کو عالمی معیار کے کمرشل مواصلاتی نظام کا حصہ بنانے کو وقت کی اہم ضرورت قرار دیا اور کہا کہ معیاری ریلویز نظام ملکی آمدنی میں اضافے اور معاشی ترقی میں قابل قدر کردار ادا کر سکتا ہے۔
وزیر اعظم نے ریلویز کے ڈھانچے کے منافع بخش کمرشل استعمال کیلئے پبلک پرائیویٹ پارٹنرشپ کے امکانات کا بھرپور جائزہ لینے اور پاکستان ریلویز کے منظم نظم و نسق اور کمرشل سطح پر موثر استعمال کیلئے جامع اور قابل عمل حکمت عملی جلد مرتب کرنے کی خصوصی ہدایات دیں۔
اجلاس میں شریک نجی شعبے کے ماہرین نے پاکستان ریلویز کی کارکردگی کو مزید بہتر بنانے اور اسکے کمرشل استعمال کے حوالے سے مختلف سفارشات پیش کیں جن پر وزیراعظم نے اظہار تشکر کیا۔
اجلاس میں وزیر ریلویز محمد حنیف عباسی، وزیر خزانہ محمد اورنگزیب، وزیر اطلاعات و نشریات عطا اللہ تارڑ، وزیر موسمیاتی تبدیلی مصدق ملک، وزیر اقتصادی امور احد خان چیمہ، وزیراعظم کے معاون خصوصی ہارون اختر، نیشنل کوآرڈی نیٹر ایس آئی ایف سی لیفٹیننٹ جنرل(ر)سرفراز احمد، متعلقہ وزارتوں کے سیکرٹریز، دیگر سرکاری عہدیداران اور نجی شعبے سے تعلق رکھنے والے ماہرین زید بشیر، پیر سعد احسان الدین اور دیگر نے شرکت کی۔
