پشاور : مشیر اطلاعات خیبرپختونخوا بیرسٹر سیف نے کہا ہے کہ ہم افغانستان کیساتھ بہتر سماجی و تجارتی روابط کے فروغ کے خواہاں ہیں، جعلی وفاقی و صوبائی وزراء کی علی امین اورافغان قونصل جنرل کی ملاقات پرتنقید مضحکہ خیزہے،18ویں ترمیم کے بعد وزیراعلیٰ غیر ملکی دورے اور معاہدے کرسکتے ہیں۔
تفصیلات کے مطابق ایک بیان میں مشیر اطلاعات خیبرپختونخوا بیرسٹر سیف نے کہا کہ جعلی وفاقی و صوبائی وزراء کی علی امین اورافغان قونصل جنرل کی ملاقات پرتنقید مضحکہ خیزہے، جعلی وزراء یا آئین سے نابلد ہیں یا عوام کی آنکھوں میں دھول جھونکنے کی ناکام کوشش کررہے ہیں۔
انہوں نے کہا کہ 18ویں ترمیم کے بعد وزیراعلیٰ غیر ملکی دورے اور معاہدے بھی کرسکتے ہیں۔انہوں نے کہا کہ یہ بھول گئے ہیں کہ شہباز شریف بھی بحیثیت وزیراعلیٰ مختلف ممالک کے دورے کیا کرتے تھے، ان دوروں میں شہباز شریف نے تجارتی معاہدے بھی کئے اور خوب کمیشن بھی کمایا، تنقید کرنے والے بتائیں مریم نوازنے بطوروزیراعلیٰ کتنے سفراء سے ملاقاتیں کیں؟۔ انہوں نے کہا کہ علی امین گنڈاپورنے غیر ملکی سفراء اور قونصل جنرلز سے ملاقاتیں کی ہیں اور آئندہ بھی کرینگے، ہم افغانستان کے ساتھ بہتر سماجی و تجارتی روابط کو فروغ دینا چاہتے ہیں، افغان قونصل جنرل سے علاقائی امن اور باہمی تجارت پر بات ہوئی ہے۔
