بیجنگ(شِنہوا)چین نے الیکٹرانک مصنوعات سے متعلق معلومات مٹانے کے بارے میں ایک لازمی قومی معیار جاری کیا ہے جس کا مقصد استعمال شدہ آلات کی گردش کے دوران ڈیٹا کے افشا ہونے کے خطرات کو کم کرنا ہے۔
مرکزی سائبر سپیس امور کمیشن کے دفتر کے مطابق اس معیار کا مقصد الیکٹرانک مصنوعات سے ڈیٹا مٹانے کے تکنیکی طریقوں کو معیاری بنانا اور ری سائیکلنگ سے وابستہ اداروں کو انتظامی اور تکنیکی اقدامات بہتر بنانے کی رہنمائی فراہم کرنا ہے تاکہ سیکنڈ ہینڈ مارکیٹ میں ڈیٹا لیک ہونے سے بچاؤ ممکن ہو سکے۔
یہ معیار یکم جنوری 2027 سے نافذ العمل ہوگا۔
اس معیار کے تحت مینوفیکچررز کے لئے لازم ہوگا کہ وہ ڈیٹا مٹانے کے لئے اندرونی فیچرز فراہم کریں۔ اگر ایسے فیچرز تیار کرنا ممکن نہ ہو تو مینوفیکچررز کو بیرونی ڈیٹا مٹانے کے آلات فراہم کرنا ہوں گے، صارفین کو دستیاب تھرڈ پارٹی ٹولز سے آگاہ کرنا ہوگا یا مفت ڈیٹا مٹانے کی خدمات فراہم کرنا ہوں گی۔
ری سائیکلنگ کے اداروں پر لازم ہوگا کہ وہ آلات جمع کرنے سے پہلے صارفین کو اپنا ڈیٹا مٹانے کی پیشگی یاد دہانی کرائیں اور رضامندی کے بغیر ان پر صارف کے ڈیٹا تک رسائی یا اسے محفوظ رکھنے پر پابندی ہوگی۔
انہیں اس بات کا بھی پابند کیا گیا ہے کہ وہ صارف کے ڈیٹا کو مٹانے کے لئے منظور شدہ آلات استعمال کریں، دوبارہ فروخت سے پہلے ڈیٹا مٹانے کی اثر انگیزی کی تصدیق کریں اور اس بات کو یقینی بنائیں کہ جن آلات میں ڈیٹا مکمل طور پر صاف نہ ہوا ہو انہیں نہ تو دوبارہ فروخت کیا جائے اور نہ ہی برآمد کیا جائے۔
