پاکستان اور برطانیہ نے اہم شعبوں میں تعاون کو مزید وسعت دینے کے مشترکہ عزم کا اعادہ کیا ہے۔
جاری بیان کے مطابق وزیراعظم شہباز شریف سے برطانیہ کی وزیر مملکت برائے عالمی ترقی و افریقہ بیرونس جینی چیپ مین نے ملاقات کی جس میں باہمی دلچسپی کے امور بشمول ترقیاتی تعاون، موسمیاتی تبدیلی، اقتصادی مشغولیت اور وسیع تر علاقائی امور پر تبادلہ خیال کیا۔
دونوں اطراف نے اہم شعبوں میں تعاون کو مزید وسعت دینے کیلئے اپنے مشترکہ عزم کا اعادہ کیا۔
وزیراعظم نے کہا کہ پاکستان اور برطانیہ کے درمیان مشترکہ تاریخ، مضبوط ادارہ جاتی روابط اور باہمی احترام پر مبنی دیرینہ تعلقات ہیں۔
انہوں نے کہا کہ برطانیہ میں موجود پاکستانی دونوں ممالک کے درمیان اہم پل کے طور پر کام کر رہے ہیں۔
وزیراعظم نے برطانوی وزیر کے دورے کا خیر مقدم کرتے ہوئے کہا کہ یہ دورہ دونوں ممالک کے درمیان شراکت داری کو مضبوط بنانے میں معاون ثابت ہوگا۔
