فیلڈ مارشل و چیف آف ڈیفنس سٹاف جنرل سید عاصم منیر نے کہا ہے کہ جدید جنگی ماحول میں حالات سے باخبر رہنا، بروقت فیصلے کرنا ناگزیر ہے، پاک فوج اندرونی و بیرونی چیلنجز، انتہاء پسندانہ نظریات، قومی استحکام کو نقصان پہنچانے والی تقسیم پسند قوتوں سے نمٹنے کیلئے مکمل طور پر تیار و پرعزم ہے۔
ہفتے کو آئی ایس پی آر کی جانب سے جاری بیان کے مطابق چیف آف ڈیفنس فورسز، فیلڈ مارشل سید عاصم منیر نے گوجرانوالہ اور سیالکوٹ گیریژن کا دورہ کیا، گوجرانوالہ پہنچنے پر کور کمانڈر گوجرانوالہ نے فیلڈ مارشل کا استقبال کیا۔
ترجمان کے مطابق آرمی چیف کو فارمیشن کی آپریشنل تیاریوں اور جنگی صلاحیتوں میں اضافے کیلئے کئے گئے اقدامات پر بریفنگ دی گئی۔
فیلڈ مارشل نے فیلڈ ٹریننگ ایکسرسائز اور جدید سمیولیٹر ٹریننگ سہولت کا مشاہدہ کیا اور فارمیشن کے اعلی پیشہ ورانہ معیار و مجموعی تیاری کی تعریف کی۔
آئی ایس پی آرکے مطابق فیلڈ مارشل نے افسران اور جوانوں سے گفتگو کی، بلند حوصلے، قومی سلامتی کیلئے غیر متزلزل عزم کو سراہا اور سخت، مقصد پر مبنی تربیت کی اہمیت پر زور دیا۔
ترجمان پاک فوج کے مطابق فیلڈمارشل نے ٹیکنالوجی سے ہم آہنگی کی اہمیت پر زور دیتے ہوئے کہا کہ جدید جنگی ماحول میں حالات سے باخبر رہنا اور بروقت فیصلے کرنا ناگزیر ہیں۔
انہوں نے کہا کہ پاک فوج اندرونی و بیرونی چیلنجز، انتہاپسندانہ نظریات اور قومی استحکام کو نقصان پہنچانے والی تقسیم پسند قوتوں سے نمٹنے کیلئے مکمل طور پر تیار اور پرعزم ہے۔
