سعودی عرب اور قطر کے درمیان دونوں ملکوں کے دارالحکومتوں کو ریل کے ذریعے آپس میں جوڑنے کیلئے ہائی سپیڈ ریل بنانے کے معاہدہ طے پاگیا ہے۔
غیر ملکی میڈیا کے مطابق معاہدہ دونوں خلیجی ممالک کے مابین تعاون کی تاریخ میں اپنی نوعیت کا پہلا معاہدہ ہے جو سعودی دارالحکومت ریاض میں سعودی ولی عہد محمد بن سلمان اور قطر کے امیر شیخ تمیم بن حمد آل ثانی کے درمیان ریاض میں ملاقات کے دوران طے پایا۔
ریل 300 کلومیٹر فی گھنٹہ کی رفتار سے چلے گی جس سے دونوں شہروں کے درمیان سفر صرف دو گھنٹے تک محدود ہو جائیگا۔
ہائی سپیڈ ریل لائن ریاض کے شاہ سلمان ایئر پورٹ سے دوحہ کے حمد ایئرپورٹ تک بنے گی جبکہ منصوبے کا دائرہ کار صرف ریاض اور دوحہ تک محدود نہیں رہے گا بلکہ سعودی شہر العیوف اور دمام بھی اس ریل نیٹ ورک کا حصہ ہونگے۔
منصوبہ چھ سال میں مکمل کیا جائیگا جو سالانہ ایک کروڑ مسافروں کو سفر کی سہولت دیگا اور دونوں ملکوں میں 30 ہزار نوکریاں پیدا کریگا، دونوں ملکوں کے درمیان حالیہ برسوں کے دوران تعلقات میں بہترہی آئی ہے اور یہ منصوبہ اسی بہتر ہوتے تعاون کی ایک اہم مثال ہے۔
