اسلام آباد:جرمنی میں پاکستانی سفارتخانے پر مشتعل مظاہرین کے حملے ،قومی پرچم اتارنے کیخلاف وفاقی کابینہ اراکین نے ‘حرمت پرچم’ مہم شروع کردی۔تفصیلات کے مطابق جرمنی میں پاکستانی سفارتخانے پر مشتعل مظاہرین کے حملے اورقومی پرچم اتارنے کیخلاف کابینہ اراکین نے ‘حرمت پرچم’ مہم شروع کردی۔
وفاقی وزراء اسحاق ڈار، اویس لغاری، عبدالعلیم خان، رانا تنویر، عطااللہ تارڑ ،مصدق ملک، علی پرویز ملک، جام کمال سمیت دیگر وزراء نے قومی پرچم کے ہمراہ تصاویر سوشل میڈیا پر جاری کرتے ہوئے قومی پرچم سے والہانہ محبت کے پیغامات بھی تحریر کئے ہیں۔مصدق ملک، علی پرویز ملک اور جام کمال نے تصاویر کیساتھ اپنے پیغام میں پاکستان زندہ باد تحریر کیا۔
وفاقی وزیر اطلاعات عطا اللہ تارڑ نے تصویر پوسٹ کرتے ہوئے لکھا کہ چاند روشن چمکتا ستارہ رہے، سب سے اونچا یہ جھنڈا ہمارا رہے، پاکستان کے دشمنوں کو واضح پیغام۔ انہوں نے کہا کہ سیاسی کارکن، صحافی، دانشور، اساتذہ، وکلا، ڈاکٹر، کسان، مزدور، طالب علم، کاروباری حضرات، بیرون ملک محب وطن پاکستانی اور پاکستانی نوجوان حرمت پرچم مہم کا حصہ بنیں، پاکستان کا پرچم ہماری قومی شناخت اور خودمختاری کی علامت ہے۔
انہوں نے کہا کہ پاکستانی پرچم قوم کے اتحاد اور یکجہتی کی نمائندگی کرتا ہے، اگست پاکستان کی آزادی کا مہینہ ہے لہٰذا حرمت پرچم کی اس مہم کو مسلسل جاری رکھیں گے، حرمت پرچم قومی ذمہ داری ہے اور اس پرعمل کرنا ہر پاکستانی کا فرض ہے ۔
