راولپنڈی: ترجمان پاک فوج نے راولپنڈی میڈیکل یونیورسٹی کے طلباء کیساتھ خصوصی نشست کا انعقاد کیا جس میں طلباء نے پاک فوج سے اظہار یکجہتی کرتے ہوئے واضح کیا کہ پاکستان کیخلاف اٹھنے والی ہر میلی آنکھ کیخلاف ہم اپنی افواج کیساتھ کھڑے ہیں۔
ذرائع کے مطابق ڈی جی آئی ایس پی آر لیفٹیننٹ جنرل احمد شریف چودھری نے آر ایم یو کے طلباء کے ساتھ خصوصی نشست میں ان کے سوالات کے جوابات دیئے ۔ طلباء نے سیشن کی بھرپور پذیرائی کی اور قومی جذبے کا اظہار کیا۔
طلباء نے افواج پاکستان سے یکجہتی کا اعلان کرتے ہوئے کہا کہ ایسے مواقع وقت کی اہم ضرورت ہیں جن کے ذریعے نوجوان نسل کو ملکی دفاع اور افواج پاکستان سے جوڑا جا سکتا ہے۔ طلباء نے کہا کہ وطن دشمن عناصر چاہے جتنی بھی کوشش کر لیں، مگر نوجوان نسل کو اپنی افواج سے دور نہیں کر سکتے، افواج ہم سے ہیں اور ہم افواج سے ہیں۔
انہوں نے اس عزم کا اعادہ کیا کہ پاکستان کیخلاف اٹھنے والی ہر میلی آنکھ کے خلاف ہم اپنی افواج کے ساتھ کھڑے ہیں۔
