حزب اللہ کے سکریٹری جنرل نعیم قاسم نے کہا ہے کہ صرف میدان جنگ ہی حزب اللہ اور اسرائیل کے درمیان دشمنی کا خاتمہ کر سکتا ہے،جب تک اسرائیل لبنان پر حملے بند نہیں کرتا جنگ بندی پر کوئی بات چیت نہیں ہوگی، اسرائیل کے ساتھ جنگ بندی کے لیے امریکی انتخابات کے نتائج پر اعتبار نہیں کر تے۔
غیر ملکی میڈیا کے مطابق اپنے ایک بیان میں نعیم قاسم نے کہا کہ لبنان کے ذریعے اس وقت تک بالواسطہ مذاکرات کا کوئی راستہ نہیں ہو گا،لبنان کی اسرائیل کے ساتھ بالواسطہ مذاکرات میں داخل ہونے کی شرط مکمل جنگ بندی ہے۔ انہوں نے مزید کہا کہ بالواسطہ مذاکرات حزب اللہ کی جانب سے لبنانی پارلیمنٹ کے اسپیکر نبیہ بری کریں گے۔ نعیم قاسم نے کہاکہ حزب اللہ اسرائیل کو میزائلوں اور ڈرونز سے نشانہ بنا رہی ہے۔
انہوں نے مزید کہا کہاسرائیل میں کوئی جگہ نہیں ہے جو ہماری پہنچ سے دور ہے، وہ دن آنے والے ہیں، جب ہم فتح یاب ہوں گے۔ انہوں نے مزید کہاکہ "ہمارے پاس دسیوں ہزار تربیت یافتہ جنگجو ہیں جو ڈٹ کر مقابلہ کر سکتے ہیں۔ ہمارے پاس طویل عرصے تک لڑنے کی ضروری صلاحیتیں ہیں۔ انہوں نے کہاکہ حزب اللہ امریکی انتخابات کے نتائج پرفیصلے نہیں بدلے گی، امریکہ میں کون جیتا ہے،اس سے انہیں کوئی سروکار نہیں "۔ صرف میدان ہی سرحد پار جارحیت کو روک سکتا ہے۔
نعیم قاسم نے کہا کہ اسرائیلی وزیر اعظم بینجمن نیتن یاہو جنگ کے خاتمے کے لیے تاریخ طے کرنے سے انکار کرتے ہیں۔ وہ ایک ایسے منصوبے کا سامنا کر رہے ہیں جس میں توسیع کی جائے گی۔ وہ جنگ کو غزہ، فلسطین اور لبنان سے آگے مشرق وسطی تک پھیلانا چاہتے ہیں۔
