کراچی: محکمہ موسمیات نے پیش گوئی کی ہے کہ(کل) منگل کو کراچی میں زیادہ سے زیادہ درجہ حرارت 38 ڈگری سینٹی گریڈ سے تجاوز کرسکتا ہے۔ محکمہ موسمیات کے ارلی وارننگ سینٹر کی ایڈوائزری کے مطابق (آج) پیر سے شہر قائد پر بلوچستان کی شمال مغربی ریگستانی ہوائیں اثرانداز ہونا شروع ہوں گی جس کے سبب (آج)پیر کو زیادہ سے زیادہ پارہ 37 ڈگری تک بڑھ سکتا ہے۔
ہوا میں نمی کا تناسب زیادہ رہنے کے نتیجے میں گرمی کی شدت اصل درجہ حرارت سے زائد محسوس کی جا سکتی ہے۔ سندھ کے دیگر اضلاع میں موسم گرم، شدید گرم اور خشک رہنے کا امکان ہے۔ اکتوبر کا مہینہ ہر سال گرم و مرطوب گزرتا ہے جبکہ نومبر کے اوائل یا وسط سے موسم خنک ہونا شروع ہوگا۔
