اسلام آباد: ایف آئی اے نے کرپشن، دھوکہ دہی اور اختیارات کے ناجائز استعمال پر سرکاری افسر سمیت 6ملزمان کو گرفتار کرلیا۔
ترجمان کے مطابق گرفتار ہونے والوں میں محمد منیر، عابد علی، محمد عمران، عماد احمد، سعد احمد اور اشتیاق احمد شامل ہیں۔ ملزم محمد منیر ایف جی ای ایچ ایف میں بطور ڈپٹی ڈائریکٹر تعینات تھا جبکہ دیگر گرفتار ملزمان کرپشن اور دھوکہ دہی سے حاصل رقوم کے بینیفشری ہیں۔
ترجمان کے مطابق ملزمان موضع تھلہ سیداں جی 14 کے سب سیکٹرز میں سپلیمنٹری ایوارڈ آف بلٹ اپ پراپرٹیز میں کرپشن میں ملوث پائے گئے، ملزمان نے اصل مالکان کو دیئے جانیوالے بی یو پیز کیساتھ پانچ بی یو پیز پر غیر قانونی طور پر پرائیویٹ افراد کو شریک مالک ظاہر کیا اور جعلی کوائف کی بنیاد پر سرکاری اہلکاروں کی ملی بھگت سے بھاری رقوم وصول کیں جس سے قومی خزانے کو لاکھوں روپے کا نقصان ہوا۔
ترجمان کے مطابق ملزمان کیخلاف مقدمہ درج کر کے مزید قانونی کارروائی شرع کردی گئی ہے۔
