اسلام آباد: وزیراعظم شہباز شریف نے اسرائیلی وزراء کا مسجد اقصیٰ پر دھاوا انسانیت کے اجتماعی ضمیر پر حملہ قرار دیتے ہوئے کہا ہے کہ مسلمانوں کے مقدس مقامات کی بے حرمتی ایک ارب سے زائد مسلمانوں کے عقیدے کی توہین ہے، اسرائیل کے جارحانہ اقدامات جان بوجھ کر فلسطین، خطے میں کشیدگی کو ہوا دے رہے ہیں۔
سوشل میڈیا سائٹ ایکس پر جاری مذمتی بیان میں وزیراعظم نے کہا کہ اسرائیلی وزرا کا آبادکار گروپوں کیساتھ مل کر مسجد اقصی پر دھاوا قابل مذمت ہے، قابض اسرائیلی حکومت کی طرف سے اس طرح کی منظم اشتعال انگیزیوں نے امن کے امکانات کو خطرے میں ڈال دیا ہے۔
انہوں نے کہا کہ اسرائیل کے جارحانہ اقدامات جان بوجھ کر فلسطین اور خطے میں کشیدگی کو ہوا دے رہے ہیں اور مشرق وسطی کو مزید عدم استحکام اور تنازعات کی طرف دھکیل رہے ہیں۔ انہوں نے کہا کہ مسجد اقصی کی بے حرمتی نہ صرف ایک ارب سے زائد مسلمانوں کے عقیدے کی توہین ہے بلکہ عالمی قانون اور انسانی اجتماعی ضمیر پر بھی براہ راست حملہ ہے۔
انہوں نے کہا کہ پاکستان عالمی قانون اور اقوام متحدہ کی متعلقہ قراردادوں کے مطابق فوری جنگ بندی، تمام جارحیت کے خاتمے اور ایک قابل اعتماد امن عمل کے احیا کے مطالبے کا اعادہ کرتا ہے جس سے فلسطین کی ایک آزاد اور قابل عمل ریاست کا قیام عمل میں لایا جائے جس کا دارالحکومت القدس الشریف ہو۔
