وزیراعظم شہباز شریف نے قومی دن پر یواے ای کی قیادت ، عوام کو مبارکباد دیتے ہوئے کہاہے کہ پاکستان ہمیشہ یو اے ای کا ثابت قدم بھائی ،شراکت دار رہا ،تاریخی وبرادرانہ تعلقات مزید مضبوط بنانے ،باہمی فائدہ مند اقتصادی شراکت داری میں بدلنے کی کوشش جاری رکھیں گے۔
سوشل میڈیا سائٹ ایکس پر وزیراعظم شہباز شریف نے متحدہ عرب امارات کی قیادت اور عوام کو 53ویں قومی دن پر مبارکباد پیش کرتے ہوئے کہاہے کہ ہمیں متحدہ عرب امارات کی ترقی اور خوشحالی کے شاندار سفر پر فخر ہے جو شیخ زاید بن سلطان النہیان مرحوم کی دانشمندی اور فہم و فراست کی وجہ سے ممکن ہوا۔
انہوں نے کہا کہ جدت کے اس وژن کو میرے بھائیوں شیخ محمد بن زید النہیان اور شیخ محمد بن راشد آل مکتوم نے آگے بڑھایا ۔ انہوں نے کہا کہ پاکستان ہمیشہ سے یو اے ای کا ثابت قدم بھائی اور شراکت دار رہا ہے۔ انہوں نے کہا کہ ہم اپنے تاریخی اور برادرانہ تعلقات کو مزید مضبوط بنانے اور انہیں باہمی طور پر فائدہ مند اقتصادی شراکت داری میں تبدیل کرنے کی کوشش جاری رکھیں گے، پاکستان متحدہ عرب امارات دوستی زندہ باد۔
