کراچی: کراچی میں سینئر وکیل شمس الاسلام کے قتل کے الزام میں گرفتار ملزم عمران آفریدی نے اعتراف جرم کرلیا۔ پولیس حکام کے مطابق ملزم عمران نے قتل کو ذاتی انتقام قرار دیتے ہوئے بتایا کہ مقتول اور میرے والد کے درمیان 35لاکھ روپے کا لین دین تھا جس پر شمس الاسلام نے میرے والد کو اغوا کر کے شدید تشدد کا نشانہ بنایا جس کے نتیجے میں ان کی موت واقع ہوئی۔
ملزم نے دعوی کیا کہ مقتول وکیل نے میرے خاندان کے خلاف جھوٹے مقدمات درج کروائے جن میں دہشت گردی اور سنگین نوعیت کے الزامات شامل تھے، ہماری خواتین کو بھی جھوٹے مقدمات میں گھسیٹا گیا حالانکہ ان کا ان معاملات سے کوئی تعلق نہیں تھا۔
اعترافی بیان میں عمران آفریدی نے کہا کہ انصاف نہ ملنے کی وجہ سے انتقامی قدم اٹھانے پر مجبور ہوا، قتل میں نے کیا ہے، میرے کسی عزیز، دوست یا رشتہ دار کا اس واقعے سے کوئی تعلق نہیں ہے ۔
