فیلڈ مارشل سید عاصم منیر نے پی ایل اے کی 98ویں یوم تاسیس پر مبارکباد دیتے ہوئے کہا کہ پاک چین سٹرٹیجک تعلقات باہمی اعتماد، غیر متزلزل حمایت اور مشترکہ عزم کی مثال ہیں، پاک فوج اور پی ایل اے سچے بھائی ،پائیدار شراکت داری علاقائی استحکام کو فروغ دینے، مشترکہ سٹرٹیجک مفادات کے تحفظ میں اہم کردار ادا کرتی رہے گی۔
آئی ایس پی آر کی جانب سے جاری بیان کے مطابق چین کی پیپلز لبریشن آرمی (پی ایل اے)کے قیام کی 98ویں سالگرہ جی ایچ کیو راولپنڈی میں منائی گئی، تقریب میں پاکستان میں تعینات چینی سفیر جیانگ زیڈونگ نے بطور مہمان خصوصی شرکت کی۔
فیلڈ مارشل سید عاصم منیر نے چینی مہمانوں کا پرتپاک استقبال کیا اور چین کے دفاع، سلامتی اور قومی تعمیر میں پی ایل اے کے اہم کردار کو سراہا۔ آرمی چیف نے پاک چین تعلقات کی مضبوطی اور اسٹریٹجک اہمیت پر زور دیتے ہوئے کہا کہ دونوں ممالک کے درمیان تعلقات منفرد اور ابھرتے علاقائی و عالمی چیلنجز کے درمیان غیر معمولی طور پر لچکدار ہیں، دونوں ممالک کے درمیان دوستی مستحکم و غیر متزلزل ہے۔
آرمی چیف نے کہا کہ پاک فوج اور پی ایل اے سچے بھائی ہیں ان کی پائیدار شراکت داری علاقائی استحکام کو فروغ دینے اور مشترکہ سٹرٹیجک مفادات کے تحفظ میں اہم کردار ادا کرتی رہے گی۔آئی ایس پی آر کے چینی سفیر نے پی ایل اے کی 98ویں سالگرہ کے موقع پر تقریب کی میزبانی کرنے پر آرمی چیف کا تہہ دل سے شکریہ ادا کرتے ہوئے دہشت گردی کے خلاف جنگ میں پاکستان کی مسلح افواج کے ثابت قدم کردار کا اعتراف کیا۔
بیان کے مطابق چینی سفیر نے پاکستان کیساتھ اپنی سٹرٹیجک شراکت داری کیلئے چین کی غیر متزلزل حمایت اور عزم کا اعادہ کیا۔
