پشاور: خیبرپختونخوا میں طلبہ کو مفت کتابیں فراہم کرنیوالا بورڈ شدید مالی اور انتظامی مشکلات کا شکار ہو گیا ، فنڈز کی عدم فراہمی کے باعث آئندہ سال بروقت مفت کتابوں کی ترسیل متاثر ہونے کا خدشہ ہے۔
دستاویز کے مطابق رواں سال کتابوں کی چھپائی پر7 ارب روپے سے زائد خرچ ہو ئے جس میں سے صرف 3 ارب جاری کیے گئے جبکہ 4 ارب روپے اب بھی واجب الادا ہیں۔
بورڈ کے2018 سے 2023 تک بقایاجات 10 ارب روپے ہیں جو تاحال ادا نہیں ہوسکے، ٹیکسٹ بورڈ کے بقایات 14 ارب روپے سے تجاوز کر گئے ہیں، مالی بوجھ کم کرنے کے لئے پرانی کتابوں کا دوبارہ استعمال جاری ہے۔
رواں سال تقریبا 90 ہزار پرانی کتابوں کو دوبارہ استعمال میں لایا گیا ہے، اب تک 3 کروڑ 41 لاکھ 37 ہزار 508 مفت کتب طلبہ میں تقسیم کی گئیں۔ دستاویز میں بتایا گیا ہے کہ اخراجات کم کرنے کے لئے اگلے سال کتابوں کا سائز کم کیا جائے گا، کتابوں کا سائز کم کرنے سے سالانہ 67 کروڑ روپے کی بچت ہوگی۔
