نئی دہلی: بھارتی ریاست ہریانہ کے عام انتخابات کے ابتدائی نتائج میں کانگریس نے سبقت لے گئی، سرکاری اور حتمی نتائج کا اعلان (کل) منگل 8اکتوبر کوکیا جائے گا، مقبوضہ کشمیر میں بھی کانگریس سرپرائز دینے کو تیار ہے۔ ہریانہ میں الیکشن 5 اکتوبر کو ہوئے تھے اور 8 اکتوبر کو سرکاری اور حتمی نتائج کا اعلان کیا جائے گا۔
ہریانہ کی طرح کانگریس نے جموں و کشمیر کے الیکشن میں بھی نیشنل کانفرنس کے ساتھ بی جے پی کو پچھاڑ دیا ہے اور یہاں بھی یہ اتحاد آسانی سے 43 نشستیں حاصل کرلے گا۔ مقبوضہ کشمیر کی 90 نشستوں کے لیے انتخابات 18 ستمبر سے یکم اکتوبر کے دوران 3 مراحل میں مکمل ہوئے اور نتاج کا اعلان ہریانہ کے ساتھ 8 اکتوبر کو کیا جائے گا۔
دوسری جانب اروند کیجریوال کی عام آدمی پارٹی دہلی اور پنجاب کی ریاستوں میں حکمرانی کے باوجود ہریانہ میں اپنا کھاتہ نہیں کھول پائے گی۔ بھارتی میڈیا کے مطابق کانگریس نے لوک سبھا انتخابات میں شاندار کامیابی کا مظاہرہ کیا تھا اور اس سال کا اختتام بھی ایک کامیابی کے ساتھ کرنے جا رہی ہے۔
ہریانہ کے جنرل الیکشن کے ایگزٹ پول کے مطابق کانگریس 90 میں سے 55 سیٹیں جیت سکتی ہے جب کہ بی جے پی کو 25 سے 27 نشستیں مل سکتی ہیں۔ اس طرح ہریانہ میں مودی کی جماعت بی جے پی کی 10 سالہ حکومت کے خاتمے کے امکانات قوی ہوگئے ہیں۔
