اسلام آباد: توشہ خانہ 2 ریفرنس میں بانی پی ٹی آئی عمران خان و اہلیہ بشری بی بی کی درخواست ضمانت مسترد کردی گئی۔ تفصیلات کے مطابق اڈیالہ جیل میں سپیشل جج سنٹرل شاہ رخ ارجمند نے توشہ خانہ 2 ریفرنس میں بانی پی ٹی آئی عمران خان و اہلیہ بشری بی بی کی ضمانت درخواستوں پر سماعت کی۔
ایف آئی اے پراسیکیوٹر ذوالفقار عباس نقوی اپنی ٹیم جبکہ عمران خان اور بشری بی بی کے وکیل سلمان صفدر عدالت کے روبرو حاضر ہوئے۔دوران سماعت پراسیکیوشن نے مؤقف اپنایا کہ عمران خان نے سعودیہ سے ملنے والا 7 کروڑ مالیت کا قیمتی سیٹ 29 لاکھ میں حاصل کیا، نیب نے فارن آفس کے ذریعے سعوریہ سے بلغاری سیٹ کی اصل قیمت حاصل کی، اس سیٹ میں نیک لیس، ایئر رنگز، بریسلٹس اور انگوٹھی شامل ہیں۔
انہوں نے بتایا کہ بطور وزیراعظم عمران خان نے قیمتی سیٹ کی مارکیٹ قیمت اپنے آفس سیکرٹری انعام شاہ کے ذریعے 58 لاکھ روپے لگوائی، انعام شاہ اور توشہ خانے کے اپریزئر نے اس عمل کی تصدیق کی ہے۔ انہوں نے بتایا کہ عمران خان نے ریاست کو ملنے والے تحفے کو توشہ خانہ میں جمع کرائے بغیر اپنے پاس رکھا۔
پراسیکیوشن نے کہا کہ عمران خان اور بشری بی بی کیخلاف کیس ثابت شدہ ہے، درخواست ضمانت خارج کی جائے۔وکیل صفائی سلمان صفدر نے دلائل دیتے ہوئے مؤقف اپنایا کہ توشہ خانہ 2 کیس پہلے ریفرنس سے ملتا جلتا ہے، پہلے اور اس ریفرنس میں ایک جیسے الزمات اور ایک جیسے وعدہ معاف گواہ ہیں، دونوں مقدمات میں ملزمان بھی ایک جیسے ہیں۔
انہوں نے کہا کہ سپریم کورٹ کے نیب ترامیم بحالی فیصلے کے بعد اس کیس کو ختم ہونا چاہئے، پہلے نیب سے سپیشل جج سنٹرل کو کیس منتقل ہوا لیکن عمران خان اور بشری بی بی کو ضمانت نہیں ملی،عدالت سے درخواست ہے ضمانت منظور کی جائے۔
عدالت نے دونوں فریقین کے تفصیلی دلائل سننے کے بعد فیصلہ محفوظ کرلیا۔بعد ازاں کچھ دیر بعد عدالت نے فیصلہ سناتے عمران خان اور بشری بی بی کی درخواست ضمانت مسترد کردی۔
