اسلام آباد: وزیراعظم شہبازشریف نے سعودی عرب کے وژن 2030ء کو دنیا بھر کیلئے مثالی نمونہ قرار دیتے ہوئے کہا ہے کہ سعودی عرب مختلف شعبوں میں ترقی پزیر ممالک کی مثالی قیادت کررہا ہے،معاشی استحکام میں تعاون پر پاکستانی قوم سعودی عرب کی مشکور ہے۔
سعودی عرب کے 94 ویں قومی دن کے موقع پر جاری پیغام میں وزیراعظم شہباز شریف نے کہا کہ پاکستان اور سعودی عرب کے تاریخی تعلقات دینی اور ثقافتی اقدار پر مبنی ہیں، دونوں نے تمام مشکلات میں ایک دوسرے کا ساتھ دیا، انشاء اللہ پاکستان اور سعودی عرب کے مابین برادرانہ تعلقات ہمیشہ قائم رہیں گے۔
انہوں نے کہا کہ شاہ سلمان اور شہزادہ محمد کی قیادت میں سعودی عرب عظیم ملک کی حیثیت سے ابھرا، آج سعودی عرب مختلف شعبوں میں ترقی پزیر ممالک کی مثالی قیادت کررہا ہے۔انہوں نے کہا کہ پاکستان کے معاشی استحکام میں تعاون پر پوری قوم سعودی عرب کی مشکور ہے۔
