اسلام آباد: وزیراعظم شہباز شریف نے چینی کاروباری ادارے روہی گروپ کی ٹیکسٹائل شعبے میں سرمایہ کاری کا خیر مقدم کرتے ہوئے کہا ہے کہ چین ہر مشکل وقت میں پاکستان کیساتھ کھڑا رہا، دونوں ممالک کے درمیان معاشی تعلقات ہر گزرتے دن کیساتھ مزید مضبوط ہو رہے ہیں۔
تفصیلات کے مطابق چین کے روہی گروپ کے 9 رکنی وفد نے چیئرمین چیویافو کی قیادت میں وزیراعظم شہبازشریف سے ملاقات کی۔ ملاقات میں نائب وزیراعظم و وزیر خارجہ اسحاق ڈار، وزیر تجارت جام کمال خان، وزیر صنعت و پیداوار رانا تنویر حسین، وزیر سرمایہ کاری و نجکاری عبد العلیم خان، وزیر توانائی اویس لغاری و دیگر متعلقہ اعلیٰ سرکاری افسران بھی موجودتھے۔
وزیراعظم کو بریفنگ دیتے ہوئے بتایا گیا کہ چین کا روہی گروپ سندھ اور پنجاب میں عالمی معیار کے ٹیکسٹائل پارکس قائم کرے گا جس میں چین کی 100 کے قریب بڑی ٹیکسٹائل صنعتوں کو سرمایہ کاری کی دعوت دی جائے گی، ان ٹیکسٹائل پارکس کا محور پاکستان کی ٹیکسٹائل برآمدات بڑھانا اور پاکستان کو دنیا کا ٹیکسٹائل اور گارمنٹس حب بنانا ہے، ان ٹیکسٹائل پارکس میں شمسی توانائی کا استعمال کیا جائے گا اور یہ زیرو کاربن اور خود کار جدید ٹیکنالوجی پر کام کریں گے، ان پارکس سے پہلے مرحلے میں 2 ارب امریکی ڈالر جبکہ دوسرے مرحلے میں 5 ارب امریکی ڈالر کی برآمدات متوقع ہیں۔
وزیراعظم کو بتایا گیا کہ ٹیکسٹائل پارکس سے 3 لاکھ سے 5 لاکھ مقامی افراد کو روزگار کے مواقع فراہم ہوں گے،ٹیکسٹائل پارکس کا سنگ بنیاد رواں سال کے آخر میں رکھا جائے گا اور یہ تین سال کی مدت میں مکمل ہوں گے۔ وزیراعظم کو بتایا گیا کہ چینی کاروباری گروپ کراچی اور لاہور میں ایک ایک ہول سیل کموڈٹی مر کز بھی قائم کرے گا۔
وزیراعظم نے وفد کا خیرمقدم کرتے ہوئے کہا کہ روہی گروپ چین پاکستان اقتصادی راہداری کے تحت ساہیوال کول پاور پلانٹ کا اولین سرمایہ کار تھا، وزیراعظم نے چینی کاروباری گروپ کی پاکستان کے ٹیکسٹائل شعبے میں سرمایہ کاری بارے دلچسپی کو سراہا۔
ملاقات میں پاکستان اور روہی گروپ کے درمیان معاملات آگے بڑھانے بارے اسلام آباد اور بیجنگ میں ورکنگ گروپس قائم کرنے کا فیصلہ کیا گیا، وزیراعظم نے کہا کہ چین اور پاکستان کے درمیان معاشی تعلقات ہر گزرتے دن کے ساتھ مزید مضبوط ہو رہے ہیں۔انہوں نے کہا کہ چین پاکستان کا ایسا دوست ملک ہے جو ہر مشکل وقت میں پاکستان کے ساتھ کھڑا رہا ہے۔
وزیراعظم نے چینی گروپ کو سہولیات فراہمی بارے نائب وزیراعظم اسحاق ڈار کی سربراہی میں خصوصی کمیٹی تشکیل دینے کی ہدایت کی جس میں وفاقی وزراء تجارت، سرمایہ کاری و نجکاری، صنعت و پیداوار، سیکرٹری خارجہ، خصوصی سرمایہ کاری سہولت کونسل کا نمائندہ اور ظفر الدین محمود شامل ہوں گے۔
اس موقع پر گفتگو کرتے ہوئے چیئرمین روہی گروپ چیویافو نے کہاکہ ہم سرمایہ کار کی حیثیت سے نہیں بلکہ پاکستان کے دوست کی حیثیت سے پاکستان آئے ہیں۔
انہوں نے وزیراعظم کے بطور وزیر اعلیٰ پنجاب دور میں تیز رفتار ترقیاتی کاموں بارے شہباز سپیڈ کا ذکر کرتے ہوئے امید ظاہر کی کہ اس بار بھی ترقیاتی منصوبوں کی تکمیل میں یہی رفتار دیکھنے کو ملے گی۔ بعد ازاں سرمایہ کاری بورڈ اور روہی شیڈونگ گروپ کے درمیان پاکستان میں جدید ٹیکسٹائل پارکس قائم کرنے بارے مفاہمتی یادداشت پر دستخط کی تقریب منعقد ہوئی جس میں وزیراعظم اور چیئرمین روہی گروپ نے بھی شرکت کی۔
