اسلام آباد: سینیٹ میں اپوزیشن لیڈر سینیٹر شبلی فراز نے کہا ہے کہ حکمران آلہ کار، کندھوں پر آئے ہوئے لوگ ہیں، ان سے حکومت نہیں چل رہی، حکومت مخصوص نشستوں کی صورت میں خیرات لینا چاہتی ہے، تو مستحق ہونا ثابت کرے، بلاول نانا کے بنائے آئین کوپاش پاش کررہا ہے، 8 فروری کو عوام نے فیصلہ دے دیا تھا، مینڈیٹ قبول کئے بغیر تبدیلی نہیں آسکتی۔
تفصیلات کے مطابق پی ٹی آئی رہنماؤں رؤف حسن اور ابو ذر سلمان نیازی کے ہمراہ پریس کانفرنس کرتے ہوئے سینیٹ میں اپوزیشن لیڈرسینیٹر شبلی فراز نے کہا کہ اس وقت ملک میں جنگل کا قانون رائج ہے جس کا جو جی چاہتا ہے وہ اپنی طرح کا قانون بناتا ہے تاہم جنہوں نے ملک کیلئے کچھ اچھا کرنا چاہا انہیں عبرتناک مثال بنا دیا گیا۔
انہوں نے کہا کہ شہید ذوالفقار علی بھٹو نے پیپلزپارٹی کی بنیادرکھی،عوام کو سیاسی شعور اور 73ء کا آئین دیا، مگر آج ان ہی کا نواسہ کلہاڑی لے کر آئین کی رو پر کاری ضربیں لگارہا ہے، یہ اپنے نانا کے بنائے گئے آئین کو پاش پاش کررہے ہیں۔
انہوں نے کہا کہ جنہوں نے ملک کو دفاعی طور پر ناقابل تسخیر بنایا ان کیساتھ کیا کیا گیا؟، اب ایک شخص عالمی و مقامی سطح پر ملک کیلئے عزت و وقار لایا، اس نے ورلڈکپ،ملک میں حقیقی آزادی کا شعور دیا، القادر ٹرسٹ یونیورسٹی بنائی،ہمیشہ قانون و آئین کی بالادستی کی بات کی مگر سب دیکھ رہے ہیں اس کیساتھ کیا کیا جارہا ہے؟۔
انہوں نے کہا کہ بانی پی ٹی آئی کو جیل میں ڈیتھ سیل میں رکھا گیا ہے، انہیں ملاقاتوں میں مشکلات درپیش ہیں، انہیں اپنے بچوں سے بات نہیں کرنے دی جارہی۔ انہوں نے کہا کہ عدالتی فیصلوں کو جوتے کی نوک پر رکھا جارہا ہے، اس ملک کے عوام کس طرح زندگی گزار سکتے ہیں؟،ریاست کا کام لوگوں کی عزت، جان اور مال کی حفاظت کرنا ہوتا ہے مگر یہاں ان کی جان ومال اور عزت کی کوئی گارنٹی نہیں۔
انہوں نے کہا کہ جنگوں میں بھی قوانین ہوتے ہیں، بچوں،بوڑھوں اور خواتین کے حقوق ہوتے ہیں مگر یہاں کوئی پرسان حال نہیں۔انہوں نے کہاکہ آئین وقانون کی پاسداری کے علاوہ ملک نہیں چل سکتا، بشریٰ بی بی بالکل غیر سیاسی خاتون ہیں، بانی پی ٹی آئی کی اہلیہ ہونے کے ناطے ان پربے بنیاد مقدمے بنائے گئے ہیں۔
انہوں نے کہاکہ یہ سیاسی طور پر عمران خان اور ان کی پارٹی کا مقابلہ نہیں کرسکتے، 8فروری کو عوام نے اپنا فیصلہ دے دیاہے۔ انہوں نے کہاکہ ملک میں سب سے بڑے سٹیک ہولڈرز عوام ہیں، عوام کے مینڈیٹ کو قبول کئے بغیر کوئی تبدیلی نہیں آسکتی، یہ الیکشن عوام نے پی ٹی آئی کو دیا تھا، مضحکہ خیز انتخابی نشانات ہونے کے باوجود عوام نے ہمیں مینڈیٹ دیا۔
انہوں نے کہا کہ حکومت مخصوص نشستوں کی صورت میں خیرات لینا چاہتی ہے، اگر حکومت خیرات لینا چاہتی ہے تو وہ ثابت کرے کہ وہ اس کی مستحق ہے۔انہوں نے کہا کہ یہ ایک سیاسی جماعت نہیں،آلہ کار ہیں،کندھوں پر آئے ہوئے لوگ ہیں،بیساکھیوں پر چل کر آنیوالوں سے حکومت نہیں چل رہی، تمام قانونی ضابطوں کی کھلم کھلا خلاف ورزی ہورہی ہے۔
انہوں نے کہ لاہورجلسہ بالکل ہوگا،اجازت کیلئے لاہورہائیکورٹ درخواست دی ہوئی ہے، ہم نے پہلے بھی پرامن جلسے کئے،اب بھی کریں گے، ہمارا لاہور سمیت دیگر شہروں میں بھی جلسے کرنے کا پروگرام ہے۔
