نیویارک: اقوام متحدہ میں پاکستان کے مستقل مندوب منیر اکرم نے فتنہ الخوارج کیخلاف کاررائیوں کے پاکستانی عزم کا اظہار کرتے ہوئے کہا ہے کہ فتنہ الخوارج کو افغان عبوری حکومت کی سرپرستی حاصل ہے، وہ اسی کی حمایت سے پاکستان پردہشت گرد حملے کرتے ہیں، ٹی ٹی پی خطرے کو ختم کرنے کیلئے علاقائی و عالمی تنظیموں کیساتھ تعاون کیلئے تیار ہیں۔
تفصیلات کے مطابق افغانستان کی صورتحال پر سلامتی کونسل اجلاس سے خطاب میں اقوام متحدہ میں پاکستان کے مستقل مندوب منیر اکرم نے افغانستان میں انسانی بحران اور خواتین کی آواز دبانے پر تشویش کا اظہار کرتے ہوئے کہا کہ فتنہ الخوارج افغانستان کی سب سے بڑی دہشت گرد تنظیم ہے، وہ افغان عبوری حکومت کی حمایت سے پاکستان میں دہشت گرد حملے کررہے ہیں۔
انہوں نے کہا کہ پاکستان قومی سطح پر فتنہ الخوارج کیخلاف کارروائیاں کرتا رہے گا۔ انہوں نے کہا کہ ٹی ٹی پی خطرے کو ختم کرنے کیلئے پاکستان علاقائی و عالمی تنظیموں کیساتھ تعاون کیلئے تیار ہے۔ انہوں نے کہا کہ افغان حکومت اپنی بین الاقوامی ذمہ داریوں پرعمل کرے، عالمی برادری بھی افغانستان میں اپنے مقاصد کو نظر انداز نہ کرے۔
