اسلام آباد: پاکستان اور روس نے تعلقات مزید مستحکم کرنے کے عزم کا اعادہ کرتے ہوئے دوطرفہ روابط جاری رکھنے پر اتفاق کیا ہے۔
تفصیلات کے مطابق وزیراعظم شہباز شریف سے روسی نائب وزیراعظم الیکسی اوورچک نے ملاقات کی اور دو طرفہ تعاون پر تبادلہ خیال کیا۔وزیراعظم نے کہا کہ روس کیساتھ مضبوط تعلقات پاکستان کی خارجہ پالیسی کی اہم ترجیحات میں سے ایک ہیں، روس کیساتھ تجارتی، اقتصادی، توانائی، مواصلات اور سیکیورٹی تعاون کو وسعت دینے کے خواہش مند ہیں۔
انہوں نے بتایا کہ رواں سال جولائی کے اوائل میں روسی صدر ولادی میر پیوٹن کیساتھ انتہائی نتیجہ خیز بات چیت ہوئی تھی،وزیراعظم نے دوطرفہ تعاون میں مزید توسیع پر بات چیت کیلئے اعلیٰ سطحی وفد بھیجنے پر روسی صدر کا شکریہ ادا کیا۔انہوں نے کہا کہ ہم اگلے ماہ اسلام آباد میں روسی وزیر اعظم مشسٹن کے استقبال کے منتظر ہیں۔
اس موقع پر روسی نائب وزیراعظم اوورچک نے پرتپاک استقبال پر وزیراعظم کا شکریہ ادا کرتے ہوئے پاکستان کیساتھ تعلقات کو مزید مستحکم کرنے کے عزم کا اعادہ کیا۔ انہوں نے پاک روس تعلقات کو تعمیری اور باہمی طور پر مفید قرار دیتے ہوئے باقاعدہ رابطے برقرار رکھنے پر اتفاق کیا۔اس موقع پر دونوں رہنماؤں نے روس اور پاکستان کے درمیان مفاہمتی یادداشت پر دستخط کی تقریب میں بھی شرکت کی،مفاہمتی یادداشت کے تحت مشترکہ مفاد کے تمام شعبوں بالخصوص تجارت، سرمایہ کاری، توانائی، آئی ٹی، زراعت، سائنس و ٹیکنالوجی اور تعلیم میں تعاون کو فروغ ملے گا۔
