اسلام آباد: رہنماء پی ٹی آئی حامد خان نے کہا ہے کہ منصور علی شاہ کے سواء کوئی چیف جسٹس قابل قبول نہیں ہوگا، ہم صرف سپریم کورٹ کو مانتے ہیں کسی اور عدالت کو منظور نہیں کریں گے، یہ ایسی عدالت لانا چاہتے ہیں جس میں یہ اپنے ٹاؤٹ لا کر مرضی کے فیصلے کروائیں،اداروں کا مذاق نہیں اڑانے دیں گے۔
تفصیلات کے مطابق میڈیا سے گفتگوکرتے ہوئے پی ٹی آئی رہنماء حامد خان نے کہا کہ وکلاء عدالتی نظام کے سٹیک ہولڈرز ہیں، (آج) اہم نیشنل کنونشن کریں گے جس کا مقصد حکومت کی جانب سے لائی جانیوالی آئینی ترمیم کو مسترد کرنا ہے۔
انہوں نے کہا کہ ابھی وقت ہے نہ حالات کہ ایسی آئینی ترمیم کی جائے۔انہوں نے کہا کہ ہم نے کسی اور کورٹ کو کسی صورت منظور نہیں کریں گے، ہم صرف سپریم کورٹ کو مانتے ہیں یہ لوگ ایک ایسی کورٹ لانا چاہتے ہیں جس میں یہ اپنے ٹاؤٹ لا کر مرضی کے فیصلے کروائیں گے۔
انہوں نے کہا کہ اقدام سے سپریم کورٹ کی آئینی حیثیت میں کمی آجائے گی جب کہ ہم ان عدالتوں کو مزید طاقتور کرنا چاہتے ہیں۔ انہوں نے کہا کہ کوئی پانچ کا پینل نہیں بنے گا، سپریم کورٹ کے جو سینئر ترین جج ہوگا وہی چیف جسٹس بنے گا، منصور علی شاہ کے سوا کوئی قبول نہیں۔
انہوں نے کہا کہ ہم اداروں کا مذاق نہیں اڑانے دیں گے، سپریم کورٹ کا کام ہی مفاد عامہ کے کیسز کو سننا ہے، عدالت کو اپنا کیس مینجمنٹ بہتر بنانے کی ضرورت ہے ناکہ نئی کورٹ بنا دی جائے۔
